كانت الفنانة سعاد نصر معروفة بأعمالها التلقائية، ففى إحدى المرات عُرض عليها أن تقدم دور شخصية من داخل مستشفى الأمراض العقلية، فقررت أن تذهب للمستشفى بنفسها لترى طبيعة الحياة بعينها، وعندما سئلت فى أحد اللقاءات التليفزيونية عن أصعب موقف لها أثناء التحضير لشخصية من قبل، روت هذا الموقف بشكل طريف كاما كان معهود عليها، قائلة: أنا أقدم هذه السنة مسلسل فيه شخصية واحدة مجنونة، فالمخرج قال لى ما تروحى مستشفى المجانين تقعدى مع اتنين أو تلاتة من الحالات الخفيفة، يعنى اللى هما أقدر أتكلم معاهم عشان آخد منهم للشخصية اللى بعملها، فذهبت بالفعل.. كنت متوترة، فجلست فى الجنينة والمخرج ومساعده جوا بيتكلموا مع المشرفين عشان يجيبوا حالة تكون لطيفة أعرف أتكلم معاها، وأنا قاعدة فى الجنينة لقيت واحد لطيف جداً ولابس شيك جداً عرفنى فقالى: (أهلاً، أنا بشوفك فى التليفزيون)، أنا طبعاً اتصورت أنه مجنون فى الأول، فقولت له وأنا أبتعد عنه خطوة بخطوة أيوا يا فندم أنا بعمل السنة دى شخصية مجنونة فجاية أقعد مع كذا حالة هنا.. قال لى دى حاجة صعبة أنا شخصياً ليا واحد قريبى جوا لما باجى أزوره مبقدرش أقعد معاه جوا بقعد فى الجنينة هنا وهما يجيبهولى أقعد معاه، اطمنت أنه مش مجنون، وقعدنا بقى نرغى ونتكلم، وقال لى إنه مدرس فلسفة فى كلية الآداب، فقعدنا نتناقش فى الفلسفة وكلام الفلاسفة، والدنيا كانت حر وأنا عطشت فقولت له هو مفيش حاجة ساقعة هنا؟ قال لى فيه طبعاً عايزة إيه؟ قولت له أى عصير برتقال أو ليمون بس ياريت يبقى ساقع، قال لى هاتى 5 صاغ، قولت له المشروب بخمسة صاغ بس، طب والله كويس جداً، راح واخد منى الـ5 صاغ وراح فاحت فى الأرض وحاططها وردم عليها بالتراب! أنا طبعاً النبض وقف شوية وقولت له «إيه الـ5 صاغ وقعت منك؟؟»، قال لى: لأ موقعتش، بس إنتى لما تحطى الخمسة صاغ فى الأرض وتردميها بالتراب تطلع شجرة فيها كوبايات برتقال وكوبايات ليمون ساقعين بالتلج بتاعهم، اصبرى بس خمس دقايق والشجرة هتطرح وتشربى اللى إنتى عايزاه، وهذه كانت أطرف حكاية لتحضير شخصية».