فى أحد الحوارات اللطيفة جداً جمع الفنانين الراحلين شادية وصلاح ذو الفقار، فى فترة زواجهما، سألها المحاور مازحاً:
إيه هى عيوب صلاح ذو الفقار؟

أجابت عليه ضاحكة موجهة كلامها لزوجها: عيوبك أنت عارفها عشان تملى بقولها لك، وأنا زنانة إنت عارف إنى زنانة وبقوبهالك كتير، أول حاجة إنك رغاى أوى، خصوصاً فى التليفون ده أول عيب.
صلاح: طب ممكن أدافع عن نفسي؟

شوف.. أهو، عايز ترغى بردو، طب اتفضل.
صلاح: هو أنا برغى فى التليفون إلا عشان الشغل؟
شادية: ممكن تتكلم فى الشغل باختصار، هو لازم رغى رغي؟!
صلاح: وأنتى إيه عرفك اللى بيكلمنى بيقولى إيه؟

شادية: لا لا، إنت طبيعتك رغاى دى معروفة!
وبعدين العيب التانى، لما بنيجى نخرج، المفروض الراجل هو اللى بيستنى الست لغاية ما تلبس وينزلوا، لكن كل مرة نكون خارجين أنا ألبس وأروح الأسانسير أستناه يمكن خمس دقايق وأنا عمالة أقوله يلا يلا، قال إيه بيرتب فى البيت قبل ما نمشى، لازم يحط كل حاجة مطرحها وبعدين ننزل!
صلاح: طب وده عيب بردو بذمتك؟!
شادية:آه طبعاً، العيب التالت وده الخطير جداً بقى، هو إنك بتغنى كتير، أنا نفسى بس تغنى حتة على الهوا عشان الناس تعذرنى، والنبى حاجة صغيرة بس.

صلاح: لا وده معقول، أنا بستفرد بيكى وبغنيلك إنتى لأنى مش لاقى حد فى الدنيا يتحمل صوتى غيرك، وده حقى الشرعى.
شادية: طب بس قولنا حتة صغيرة، حاجة من اللى بتقولهم فى العربية عشان مبعرفش أنط منها!