كان الفنان سعيد صالح رحمة الله عليه رجلاً واعياً ومثقفاً، له وجهة نظر مختلفة طوال الوقت، ففى أحد اللقاءات التليفزيونية سأله الإعلامى عمرو أديب عن رأيه فى الفن والإعلانات وبرامج المسابقات، قائلاً: * إيه رأيك فى الفنانين اللى بيعملوا إعلانات يا أستاذ سعيد؟ - والله أنا بقول الواحد يا يبقى فنان يا إما يبقى بتاع إعلانات، مينفعش الاتنين مع بعض، ما دام عمل إعلان مبقاش فنان بيقدم فكرة أو فن، لا بقى واحد بيتأجر عشان يعمل أى حاجة. * يعنى انت لو عرضوا عليك مليون دولار فى إعلان مش هتعمله؟! - لا مش هعمله، ولا 100 مليون دولار، هفضل أمثل بس أصل هعمل بالفلوس دى كلها إيه أصلاً؟! ما أنا عايش كويس وكده كده ميـت فى الآخر، مش هاخدهم معايا يعنى. * انت بس بتقول كده عشان متعرضش عليك! - طيب هقولك، زمان كان فيه مسلسل اسمه (صاحب العمارة)، ولا حاجة كده تقريباً، بتاع محمد رضا، وكان فيه إعلان، وبعدين قالولى هتمثل فى مشهد هتقول فيه إعلان لمنتج رحت سايب الاستوديو ومروح ومعملتوش، مع إنه مسلسل كان ممكن يتعمل منه 300 حلقة، بس أنا مبحبش كده. * طب إيه رأيك فى المسابقات اللى بتكسب الناس فلوس؟ - دى لعب بأحلام الناس، بيعيشوهم فى وهم الثروة السريعة. * طب إيه المشكلة فيها لو حد كسب مليون جنيه؟! - انت تعرف حد كسب مليون جنيه من المسابقات دي؟! * آه بنشوف بيطلعوا فى الإعلان الراجل ماسك الفلوس اللى كسبها وحاضنها وعامل كده. - طب وإنت إيش عرفك إنه كسبهم فعلاً؟! ما أنا ممكن دلوقتى أحط قدامك شوية فلوس وأقولك أحضنهم يا عمرو، واعمل إنك كسبتهم وهديك عشرة جنيه، وهتعمل كده!