لطالما اشتهر الفنان فؤاد المهندس بحبه للأطفال وتعلق الأطفال به خصوصاً بعد تقديمه لأكثر من عمل يخص الأطفال، خاصة فوازير «عمو فؤاد»، وفى أحد اللقاءات التليفزيونية سئل عما يمكن أن يبكى من أجله الفنان فؤاد المهندس، وعن تعلق الأطفال به وكان حواراً من القلب أظهر لنا مشاعر «عمو فؤاد» الجميلة..
* إيه اللى ممكن يخلى دموع فؤاد المهندس تنزل؟
- أنا الحقيقة دموعى سريعة قوي، سريع التأثر قوى خصوصاً لما يكون فى الموضوع طفل أو حيوان، إنى أشوف طفل صغير بيتألم أو منزعج من حاجة أو أشوف حيوان يتألم دموعى تنزل علطول، وبعدين كمان لما أشوف ست حامل معرفش بعيط ليه، بيصعبوا عليا قوى الستات الحوامل.
* علاقة حضرتك بالأطفال تطورت بعد فوازير «عمو فؤاد»؟
- ده أنا بقيت أشيل فيشة التليفون مخصوص كل يوم قبل ما أنام بسببهم، كل العيال بيطلبونى يقولولى «عايزين عمو فؤاد»، معرفش بيجيبوا نمرتى منين، فيه واد من فترة قطع قلبي، طلبنى فى التليفون بليل وهو منهار بيعيط قالى «أنا هشام أنت مش عارفنى يا عمو فؤاد؟»، قولت له «عارفك طبعاً مالك يا هشام».. قال لى: «ماما مش عايزة تحط التسجيل بتاع عمو فؤاد وعمالة تحط التسجيل بتاع أم كلثوم»، قولت له «طب ادينى ماما يا حبيبى»، كلمت الست وقولت لها «اعملى معروف حطى تسجيل عمو فؤاد وبلاش تسجيل أم كلثوم»، قالت لى يا أستاذ ده حاطط تسجيل الحلقة بتاعت عمو فؤاد من 5 صباحاً لحد نص الليل مش عارفين نسمع حاجة جنبه، قولت لها معلش عشان خاطرى عشان الولد يبطل عياط ويبطل يرن على التليفون، وعشان أنا أعرف أنام من فضلك شيلى الست وحطيني.