فى أحد اللقاءات التليفزيونية مع الفنان أحمد زكى، سئل عن حياته، وهل وفاة والده وبُعد والدته أثر فى حياته، وتعامله مع الناس والأماكن. * أستاذ أحمد.. عرفت اليُتم المُبكر وعشت عند جدتك وأقاربك.. كيف انعكس هذا الأمر عليك وعلى علاقتك بالأمكنة والناس لاحقاً؟ - اليتم بياخد منك أشياء وبيديك أشياء، يعنى بيخليك فى حالة تأمل مستمر، أنا فقدت والدى وأنا عندى سنة، وعندنا فى الأرياف يقولك «البنت ماتعدش عزبا وأهلها لازم يجوزوها»، فالأم كمان اختارت إنها تتجوز لأنها كانت صغيرة، فكمان فقدت أمى لأنى ماعيشتش معاها، فطبعاً فقدان الأم والأب بيخلى الحب يبقى رمادى شوية، فأنت بتبقى حابب إنك تفقد الحب الرمادى ده وتنتقل إلى نفسك، تصاحب نفسك، أو تصاحب آلامك، أو تصاحب فرحك، وترفض هذا الحب الرمادى اللى هو نوع من أنواع الشفقة أو نوع من أنواع العطف لليتيم، الكسرة دى بتخليه يبدأ يتفرج على نفسه لأنه عاوز يعبر عن أشياء ومش عاوز يتعب الناس اللى قدامه، ويبقى عايز كمان إنه ما يبقاش تقيل عليهم، فبيحرم نفسه من الشكوى علشان ما يقابلش رد الفعل اللى هو بيرفضه اللى من نوع العطف أو الشفقة، على قد ما هى قاسية إنما بحبها لأنها بتخلينى أبقى فى حالة مصاحبة لمشاعرى باستمرار، خصوصاً الواحد لما يحس إنه بقى لوحده، فيبقى عاوز يبقاله وجود أو كيان رغم إنها بتبقى مؤلمة برضو.