فى أحد اللقاءات التليفزيونية الجميلة مع الفنانة سناء جميل، سُئلت عن أصعب مشهد قدمته فى فيلم الزوجة «الثانية»، فقالت * مدام سناء.. إيه أصعب مشهد حضرتك مثلتيه فى فيلم «الزوجة الثانية»؟ - المشهد اللى دخل فيه العمدة وفاطمة الأوضة واتقفل عليهم الباب، وحفيظة دى ركبها 100 عفريت، مش قادرة تتخيل إن فى الأوضة دى جوزها مع ست تانية ففضلت طول الليل رايحة جاية تتصنت عليهم، وأنا بمثل المشهد ده عروق رقبتى خرجت برا، وكل حتة فى جسمى كانت بتتنفض، ومن كتر ما عيشت المشهد أنا دايماً لما بندمج قوى فى حاجة بتزعل فى حاجة بتحصل فيا من بداية شبابى وهى إن ركبى بتنمل كأنها بتتخدر شوية، فبقيت ماشية فى المشهد بجر رجليا عشان تمشى، خلص المشهد ولقيت المخرج صلاح أبو سيف بيقولى تعالى هنا يا سناء ده أنت عملتى مشهد مش ممكن، هااااايل، أنا حسيت إن عروق رقبتك هتطلع برا جسمك من الغيظ، إزاى قدرتى تعملى كده؟ قولت له: هقول لحضرتك الحقيقة وأنا بمثل المشهد ده بصراحة متخيلتش إن اللى جوا الأوضة ده صلاح منصور، أنا تخيلت إن اللى جوا فى الأوضة مع سعاد حسنى ده لويس جريس جوزى. قال لى: «إيه»، قولت له: «ما هو مفيش حاجة فى الدنيا هتوصلنى للحالة دى إلا إن يكون اللى جوا ده لويس».