كشفت الفنانة الشابة ميران عبدالوارث عن كواليس دورها فى مسلسل «ريڤو» الجزء الثانى، الذى قدمت من خلاله شخصية «نور».
وقالت ميران عبدالوارث، عبر تصريحات تليفزيونية لها: «دور نور فى ريڤو كان جريئاً؛ لأن أى حد بيقدم فعل مش سوى الناس بتتفاعل معاه، وبيبقى فى نوع من الكره للشخصية؛ بسبب اللى هى بتعمله فى الدور».
وأضافت: «كواليس ريفو من نوع تانى عشان فكرة التسعينات وفكرة انك بتعملى زمن تانى مش أسهل حاجة؛ لأنهم مكنوش بيتكلموا بسرعة زينا، كان فى إيقاع أبطأ فكان فى تفاصيل بهتم بيها».
أما عن نوع الأعمال الفنية التى تسعى لتقديمها، فقلت: «حابة أجرب كل الأدوار، بس نفسى أقدم دور أكشن لأنه شبهى ، أوى ونفسى اتجه الاتجاه دا وعايزة أبقى زى أنجلينا جولى».
كما روت عن رأى والدها الراحل أحمد عبدالوارث فى الوسط الفنى قبل رحيله قائلة: «بابا مكنش معارض إنى أمثل، ولكن كان عنده شوية تحفظات لأنه فاهم المجال، وعارف طبعى، وكان دايماً بيقولى بخاف إنك متعرفيش تتعاملى، بس كان شايف إنى فيا عناصر الفنانة، وكان عايزنى اكتشفها لوحدى ودا فعلاً حصل».
وعن بداية اكتشافها لموهبتها، قالت: «اكتشفت موهبتى فى الجامعة فى مسرح الجامعة، ومكنتش عايزة أمثل فى البداية، كنت شخصية انطوائية، وبتكسف جداً، وعمرى ما كنت بشوف بابا وأحس إنى عايزة ابقى زيه».