فى أحد اللقاءات التليفزيونية الجميلة مع الفنانة الراحلة رجاء الجداوى، وكان معروف عنها حبها الشديد لزوجها، سُئلت عن كيف بدأت قصة حبهما وزواجهما، فقالت:
- من تالت يوم اتعرفنا فيه على بعض، قال لى عايز أتجوزك فى الطيارة، قولت له أنت بتقبض كام؟
قالى ٥٥ جنيه، قولتله فى اليوم، قال لى، لأ فى الشهر، بس كان عندى السبب إن أنا عايزة أتجوز، كانت أمى بتموت ونفسها إن أنا أتجوز، فكان العقل هو المسيطر أكتر من القلب.
 * يعنى ما حسيتى حالك إنغرمتى فيه دوغرى؟
- لا.. أنا حبى لحسن بدأ بعد الجواز، حب استمر ٤٦ سنة ومستمر معايا لغاية النهارده وبكرة ولغاية ما أموت، أنا حطيته فوق راسى، لأنه كان راجل قوى وشهم قوى ومحب وحنون وكل حاجة، اشترينا الدبلتين وكانوا بـ٣١ جنيه، هو كان معاه ١٢ جنيه وأنا معايا ١٨ جنيه، وجيبنا الدبل، وكان ناقص جنيه. أسعد أيامى عيشتها معاه وفضل يدى سعادة وحب واحتواء لغاية ما توفى قدام عينى وهو بيدعيلى، يعنى واحد بيقولك خلى بالك من نفسك وربنا هيكرمك، بس كده.
* هل مازال حسن عايش معاكى؟
 - آه طبعاً، أقولك حاجة أنا برش البارفان بتاع جوزى ع المخدة اللى جنبى بتاعته.
 * الليلة ما بعد موته لما رجعتى على غرفتك وقعدتى فى السرير، القلب كان عامل إيه؟
- جزء من قلبى دفنته، شوفى الموت علينا حق، ولكن الفراق صعب قوى.