تصدى المخرج هادى الباجورى للانتقادات الموجهة إلى الفنانة الشابة داليا شوقى، والفنان باسم سمرة بطلى مسلسله الأخير «سفاح الجيزة»، وأكد أنه الوحيد الذى يتحمل المسؤولية، لافتاً إلى أن كل ما حدث فى العمل من اختياره. وأشار إلى أن الجمهور يفضل مشاهدة القوالب الجاهزة، وعندما يتم تقديم عمل مختلف يرفضه فى البداية، ولكن مع مرور الوقت يتقبل هذا الاختلاف. وأكد الباجورى وجود خطة لتقديم جزء جديد من العمل بعد نجاحه. الباجورى رفض حملة السخرية من اختيار باسم سمرة لتقديم شخصية الضابط، وقال، عبر تصريحات تليفزيونية له: «الجمهور بيحب يتفرج على اللى اتعود عليه، ولما بتدى له حاجة جديدة بياخد فترة علشان يتعود عليها، ليه باسم سمرة ميبقاش ظابط؟ علشان كان بيعمل أدوار بلطجى؟! وده مالوش دعوة بالموضوع والظابط فى مصر اتعودنا عليه فى المسلسلات إنه يكون له شكل معين زى أمير كرارة». ورد هادى الباجورى على الانتقادات الموجهة إلى الفنانة الشابة داليا شوقى قائلاً: «الجمهور بتاعنا بيبقى ماسك كرباج شوية، يعنى داليا فى أول 4 حلقات كان الناس طايرين بيها وشايلينها على دماغهم من فوق، ولما عملت مشهد حسوا إنها بالغت فيه مسكوا لها كرباج وسكاكين ودبحوها، مع إن إنت لو اكتشفتى إن جوزك اللى متجوزاه بقالك 4 سنين قاتل 9، وكمان خطف أختك وبيحبها، رد فعلك ممكن يكون أى حاجة». وشارك فى مسلسل «سفاح الجيزة» عدد كبير من الفنانين، ومنهم أحمد فهمى، ركين سعد، صلاح عبدالله، باسم سمرة، داليا شوقى، جيهان الشماشرجى، وعدد آخر من الفنانين، والمسلسل من تأليف محمد صلاح العزب، وإخراج هادى الباجورى.