أعربت النجمة غادة عبد الرازق، عن سعادتها بنجاح حكاية «تحت الحزام» ضمن مسلسل «حدث بالفعل»، التى قامت ببطولتها، وعرضت مؤخراً على إحدى القنوات الفضائية. وقالت غادة عبد الرازق فى تصريحات تليفزيونية، إن المسلسل كان حلقتين فى البداية لكنى جلست مع المؤلف واتفقنا أن يكون ثلاث حلقات، مستطردة: «كان فى حاجات لازم تبان، وقولتلهم خلاص نعمل 3 حلقات مع إنى كنت اتفقت خلاص، واللى حببنى فى الموضوع ده إن علياء دكتورة نفسية بتعالج الناس ومحدش تخيل إنها ممكن تكون مريضة». وتابعت عبدالرازق: «جبنا قصة مسلسل تحت الحزام من دكتور نفسى، والشخصية لسة عايشة لغاية دلوقتى، واللى حصل فى المسلسل هو اللى حصل بالتفصيل فى الحقيقة، والوحيد اللى يعرف ده الدكتور النفسى ومقدرش يبلغ عنها، ولسه لغاية دلوقتى عايشة مع ابنها وحفيدها، وهى مش مصرية». وأكدت عبدالرازق، أنها تعاطفت نفسياً مع شخصيتها فى حكاية «تحت الحزام» معلقة: «أنا لو جه حد قالى هاخد روتانا وأسافر هطفشه، وعمرى ما أوصل فى حياتى لحتة الجريمة، ولكن صعب عليا الشخصية فى مسلسل تحت الحزام إنها اتكسرت لأن حياتها كلها ابنها، ولازم الست اللى بتاخد ابن وحيد لازم تفكر فى الأم، ولازم على قد ما أديكى حب تدينى حب إنتى كمان». حكاية «تحت الحزام» ضمن حكايات مسلسل «حدث بالفعل»، كانت من بطولة غادة عبدالرازق، خالد أنور، سلمى أبو ضيف، بسنت حاتم، وكريم عبد الخالق، وهو من تأليف فادى النجار، وإخراج هشام الرشيدى.