فى أحد الحوارات الصحيفة مع الفنان الراحل حسن فايق، سأله الصحفى ممازحاً: «إيه حكاية الصلعة دى وليه مشهورة أوى كده». فقال له: «والله مش عارف إيه سبب شهرتها مع أنها صلعة زى أى صلعة، بس شهرتها دى حاجة مفرحانى، حتى وهما بيتريقوا عليها، ببقى مبسوط». * إيه ده هو فى حد بيتريق على صلعة حسن فايق؟ - يوووه كتير، صحابى وقرايبى وحتى الناس اللى بقابلهم فى الشارع. وبدأ حسن فايق يحكى أنه أحد أصحابه كل ما يروح يزوره ابنه يقول له أمال شعرك فين ياعمو.. ولا هو بيطلع لجوه؟ وواحد تانى من صاحبه، اتأخر حسن فايق على ميعاده معاه فى مرة فسأله متأخر ليه، فقال له معلش كنت عند الحلاق، فرد وقال: وده رحت له تحلق ولا تصنفر؟ وواحد تالت من صحابه مرة وهما قاعدين مع بعض، جاله تليفون، فطلع قلم وقاله قرب راسك والنبى يا حسن اكتب عليها العنوان ده. أما أكثر الإفيهات التى كانت تضحكه هو شخصياً، فكان إيفيه الراجل اللى كان بيجيى يبيع البطيخ جنب بيته، ولما كان يشوف حسن فايق معدى يعلى صوته، ويقول: «ما تاخدش الأقرع». بينما كان أحد أصحاب المحلات التى يتعامل معها حسن يسأله أول ما يدخل المحل: عندى صنف جديد يا أستاذ حسن.. تشترى، فيرد ويقول لا، وإذا بأخينا صاحب المحل يرد ويقول: «يبقى كسبنا الصلاة ع النبى».