فى أحد اللقاءات التليفزيونية مع الفنانين الراحلين سمير غانم ودلال عبد العزيز رحمة الله عليهما وكان اللقاء إبان اشتراكهما فى إحدى المسرحيات، فكان اللقاء كوميدياً كعادة سمير غانم، حيث سئل عن علاقتهما.. * قولت إن دلال مريحة جداً كفنانة معاك على المسرح.. هل هى مريحة معاك فى البيت أيضاً؟ - مش عارف، بس هى بتعمل رز كويس أوى، هى ماكنتش بتطبخ خالص لحد ما فى يوم دخلت المطبخ وعملت رز وقعدت بعدها 4 أيام، كل يوم تسألنى «إيه رأيك فى رزى؟»، أقولها «يجنن يا حياتى».. ويا ريتنى ما قولت لأن بعدها خلاص اتكتب علينا الرز.. كل يوم أسألها «هناكل إيه النهارده يا دلال؟» تقولى عاملالك شوية رز محصلوش، البنات كل ما أدخل البيت يقولولى «الحق يا بابى، مامى عملت رز تانى!»، خلاص مبقيتش أسأل عن الأكل، طالما هاكل فى البيت مش هلاقى قدامى غير الرز. * طب ليه مبتعملش حاجة تانى غير الرز؟! - لأنها ماكنتش بتعرف تطبخ أصلاً لحد ما ربنا وفقها وعرفت تعمل الرز، فخلاص الرز ملى حياتنا، وبقى شيء مقدس فى بيتنا، حياتنا بقت رز فى رز لدرجة إننا سميناها «دلال رزو».