أشادت الفنانة منى زكى بأداء نجوم فيلم «رحلة 404»، ومنهم محمد فراج ومحمد ممدوح وخالد الصاوى، المقرر طرحه فى دور العرض المصرية غداً، الخميس الموافق 25 يناير. وكتبت منى زكى عبر حسابها على «إنستجرام»: «أحب أوجه الشكر لفريق فيلم (رحلة 404) الرائع اللى استمتعت جداً بالتعاون معاهم، أنا حقيقى حبيت تجربتنا سوا، واستمتعت بيكم ومعاكم وبمواهبكم الجبارة اللى أضافت لى، وأضافت للفيلم ككل». وأضافت منى زكى: «شكراً لزميلى النجم محمد فراج صاحب الموهبة الكبيرة، واللى قدمنا سوا أعمال ناجحة قبل كده، ويارب الفيلم ده كمان يكون له نفس الحظ من نجاحنا المشترك، وأيضاً زميلى العزيز محمد ممدوح تايسون اللى بحب وبحترم فنه وموهبته لأقصى درجة، ووجوده كضيف شرف فى الفيلم كان حاجة كبيرة أوى بالنسبة لى، وطبعاً النجم الكبير والممثل اللى دايماً بنستمتع بحضوره خالد الصاوى». وأكملت منى زكى: «وطبعاً الممثلة الرائعة شيرين رضا اللى نورت الفيلم بجد، والمتميز للغاية محمد علاء.. وأكيد كل الشكر للسينارسيت الموهوب محمد رجاء اللى كتب نَص حقيقى مختلف وإنسانى وبإبداع حقيقى، وأولاً وأخيراً شكراً للمخرج هانى خليفة على مجهوده وإيمانه بالمشروع، وتوجيهاته ورؤيته المهمة دايماً». فيلم «رحلة 404» بطولة: منى زكى، ومجموعة كبيرة من ضيوف الشرف: محمد فراج، ومحمد ممدوح، وشيرين رضا، وخالد الصاوى، وشادى ألفونس، ورنا رئيس، وجيهان الشماشرجى، وعارفة عبد الرسول، وسما إبراهيم، ونورا شعيشع، تأليف محمد رجاء، وإخراج هانى خليفة.