تحدثت الفنانة لبلبة عن علاقتها طويلة الأمد مع الفنان عادل إمام كما تحدثت عن تكريمه مؤخراً. وقالت لبلبة، عبر تصريحات تليفزيونية لها: «أنا وعادل إمام عشرة طويلة وعملنا آخر مسلسلين (صاحب السعادة) و(مأمون وشركاه) أنا بعتبر كل مسلسل فيهم 5 أفلام، بنشتغل 7 شهور، وكل يوم مع بعض، وبناكل ونفكر ونمثل مع بعض، أنا عاشرت سينمائيين، والأستاذ عادل إمام أكتر ما عشت مع أهلى فى بيتى». وأضافت لبلبة: «العشرة بينى وبين عادل كبيرة وبحس بيه وبعينيه وإمتى هيقول إيه، لا يمكن أبوظ له إفيه، وهو عارف أنا بحبه قد إيه، وبخاف عليه قد إيه، وبعرف هو زعلان ولا مبسوط من مشيته فى الطرقة بتاع الاستوديو». وتذكرت لبلبة أحد المواقف التى جمعتها بالزعيم، وقالت: «وقت مرض والدتى مسابنيش، وكان خايف عليا، ولما ماتت كنا قاعدين فى العزا وقالى كلى عشان خسيتى وبقيتى تقرفى الكلب، والناس لقونى بضحك أثناء العزاء». وفى سياق آخر تنتظر النجمة لبلبة عرض أحدث أفلامها «آل شنب».