أكدت الفنانة مى فاروق أنها تحرص على أن تظهر أمام الجمهور بشكل طبيعى دون وجود أى فلتر، لافتة إلى أن كل شخص يرى الآخرين بطريقته. وقالت مى فاروق فى تصريحات إذاعية، «أصبحت لا أهتم بتوضيح الصورة لو اهتزت، واتركها للزمن، فشغلى وحفلاتى هما الجزء الظاهر من صورى للجمهور». وتابعت: «كثير من الناس حاكمة عليا بصورة مسبقة إنى مغرورة وامرأة حديدية، يمكن ده من وقفتى على المسرح أو لأنى بعيدة.. بعد وقت الأغلبية شافوا إنى فى حالى وماشية على الله وبسبب ده مبحكمش على غيرى». وأضافت: «القرب فى حياتى بيكون للمقربين، كان لوالدى ووالدتى رحمة الله عليهما، وحالياً أخويا وأسرته وولاده وصاحبة عمرى رباب، وصحابى اللى ماسكين شغلى، ومؤخراً خطيبى محمد ربنا رزقنى بيه وحلى حياتى.. هم منطقة الأمان لى وغير مستعدة لخسارة أحدهم لأنهم يحبونى جداً». واستكملت: «ولادى نور حياتى أتمنى أكون أم يتشرفوا بيها»، وعن التخطيط فى حياتها، قالت: «أنا من الناس اللى بتهتم بالتخطيط وبفكر كثير لدرجة مجهدة، ومترددة فى اتخاذ أى قرار بس اكتشفت إن اللى بيجى صدفة أحلى، رغم إن عدم التنظيم بيسبب لى توتر».