كشف الفنان يورى مرقدى سبب عدم استمراره فى التمثيل بعد تجربة فيلم «الحياة منتهى اللذة». وقال يورى مرقدى، عبر تصريحات إذاعية له: «حبيت تجربة التمثيل لكن مكررتهاش لأنى كنت جبان، جالى ورق لكن كنت خايف، كنت بقول إنى مقدرش اشتغل فى فيلم نوعاً ما يقلل من التجربة اللى عندى فى الفيلم ده». وتابع مرقدى: «أنا فاكر لما كلمت مامتى بعد ما قالولى مين فريق العمل معايا، كنت قاعد فى الاجتماع وعامل نفسى واثق ومضيت العقد خرجت مسكت الموبايل قلت لها ماما إنتى عارفة السواق بتاعى فى الفيلم مين أحمد راتب، حاجة خرافية، الناس أحاطونى وآمنوا بيا، وبعدها وقفت ونفسى أرجع وأمثل تانى». وختم مرقدى: «أغنية شفتى وصلتى بيا لإيه، بتجيلى تعليقات على السوشيال ميديا والغريب من ناس عمرهم 16 سنة والفيلم 2005 يعنى مكنوش موجودين، سمعوها فين؟ لما قالولى عاوزينك فى الفيلم ده مكنتش مصدق إنى همثل فى مصر بالنسبة لينا فى لبنان دا هوليوود، وهمثل بالمصرى ودور بطولة كان أكبر من أنى دماغى تستوعبه، دا وسام شرف على صدرى».