فى أحد الحوارات الصحفية مع الفنان عماد حمدى، رحمة الله عليه، سئل عن ترشيحه لخمسة فنانين لتقديم أدوار البطولة، فكان هذا اللقاء: * أستاذ عماد ترشح مين الآن برأيك لأدوار الفتى الأول من الشباب الحاليين اللى طالعين؟ - إحنا عندنا حالياً فى مصر خمس أولاد، مش أولاد يعنى أولاد… حنقول عليهم أولاد، يعنى شباب.. أولاً كلهم يشتركوا فى حاجة مهمة جداً وهى التعليم العالي. العلم للفنان أهم من الفن نفسه. لأنه بيكونه أخلاقياً وثقافياً، وبيعلمه إزاى يقدر يشق طريقه فى الحياة وما يغلطش. * مين الأسماء بالترتيب؟ - أنا حأذكرهم لك حسب ترتيب ظهورهم وهم دلوقتى محتلين القمة فى السينما العربية، أولهم الأخ محمود ياسين، وده راجل عنده شهادة حقوق، يعنى محامى وفى الوقت نفسه لما حب يمثل دخل المعهد العالى للفنون المسرحية وأخذ الدبلوم بتاعته، فهو يحمل شهادتين. الثانى اللى يليه حسين فهمى، وده شاب متعلم الإخراج فى جامعة كاليفورنيا، ومعاه شهادة من هناك. وجه هنا يعمل كمخرج، وهو حالياً معيد فى معهد السينما، وبيدرس الإخراج فى السينما، إنما لوسامته وحبه للتمثيل ولحاجة الفن للون ثانى، ونجوم جدد يعنى أشكال مختلفة احترف التمثيل، ولو إنى سمعت إنه حيبتدى يخرج الأفلام بنفسه، يعنى هيرجع لشغله الأصلي. الثالث نور الشريف، ده برضه عنده معهد الفنون المسرحية، وشاب ملتزم جداً ومثقف جداً وبيقرأ كثير جداً ويشتغل مسرح كثير جداً. رابعهم سمير صبرى، ده خريج الجامعة الأمريكية، وراجل بقى لف الدنيا وثقافة عالية، ومقدم برامج عندنا فى التليفزيون، حتى بيقدم النادى الدولى اللى هو يعنى أشهر برنامج عندنا ولبق جداً، وبيعمل أحاديث ويعنى ولد على مستوى عالى، وفى السينما أصبح فى التوب والصف الأول. يجى بقى الجديد فيهم آخر واحد اللى هو دخل عليهم، زى السهم.. اللى هو محمود عبد العزيز. ده معاه ماجستير فى الزراعة، بس لما أشتغل معانا فى «لقيطة» السنة اللى فاتت، كان لسه مبتدئ فى السينما. الآن، أصبح منافس للأربعة اللى قلت لك عليهم، وهو متعلم ويعنى شهادته غريبة جداً، هو متخصص فى نحل العسل، عنده ماجستير فيها وبيحضر للدكتوراه، فهو شكله وسيم، ويظهر إنه يعنى اتصاله بحكاية العسل دى بهتت عليه وبقى حلو زى العسل. دول الخمسة إللى متصدرين، وفيه طبعاً شباب كثير غيرهم ما بقولش حاجة، بس دول الخمسة إللى تقدر تقول عليهم التوب إللى هم يعنى تقريباً بيتقاسموا أدوار الشاب الأول دلوقتي.