كشفت الفنانة هند صبرى فى المؤتمر الصحفى الذى عُقد للإعلان عن عرض الجزء الثانى من مسلسل «البحث عن علا»، تفاصيل التجهيز للمسلسل، وخطوات تنفيذه، خاصة أنها مشرف على ورشة الكتابة، بالإضافة إلى دور البطولة، ولماذا وقع الاختيار على ظافر العابدين، وكيف تم التواصل معه وغيرها من التفاصيل. وقالت هند: «فى الجزء ده من (البحث عن علا) إحنا بنكمل مشوار علا فى البحث عن نفسها، اللى عمره ما بيتوقف أو يوصل لمرحلة النهاية طول ما الإنسان عايش». وتابعت: «كنا حريصين إننا نحافظ على علا اللى الناس عرفتها وحبتها، منروحش بيها فى أى حتة الناس ما تتقبلهاش، لازم تعمل اللى الناس منتظرينه منها، عشان كده قررنا البداية من الشغل، ومحاولاتها التوازن بين شغلها وبيتها وولادها، ده التحدى اللى كلنا فعلاً بنواجهه وأنا شخصياً بواجهه وحاسة إنى بلعب بالكرات فى السيرك وخايفة حاجة تقع مني». وعن سبب اختيار الفنان ظافر العابدين لبطولة المسلسل، قالت هند صبري: «أنا وظافر أصدقاء، أنا كلّمته من 12 سنة عشان يشارك فى مسلسل (فيرتيغو)، ظافر معندوش هوس النجم الأوحد اللى يرفض يشارك فى عمل مش بطولته المطلقة، وإحنا بنكتب دور (كريم عابد) من البداية كنا شايفين ظافر، هو اللى اتوفرت فيه كل صفات الشخصية (وسامة زيادة زى ظافر وقبول وكاريزما وبيتكلم فرنساوي) فمكانش قدّامنا غير ظافر أو إننا نعمل كاستينغ وندوّر على حد جديد». وأضافت: «كمان بالإضافة لكل ده ظافر من محبى (البحث عن علا) هو وأسرته، وبنته كلّمتنى كتير عن الجزء الأول لما قابلتها فى لندن، ورحّب فور العرض عليه لأنه حابب عالم علا». وعن سبب تصوير بعض المشاهد فى فرنسا، قالت هند: «اقتراح التصوير فى فرنسا كان فكرتي، الإنتاج اتخض لما عرضت عليهم الفكرة، لأن التصوير فى باريس مُكلف وصعب، لكن القصة بشكل عفوى ذهبت بنا إلى فرنسا، وكان فى مقدّمات لده من الجزء الأول، والكواليس بالنسبة لى كانت صعبة ومجهود كبير، كنت بشتغل كل حاجة، لكن الأجواء كانت لطيفة وضحكنا كتير، وأقدر أقول إن دلوقتى بقى فى اتنين «باريس»؛ «باريس إميلى» و«باريس علا».