استعاد الفنان محمود البزاوي ذكريات من شبابه وأجاب على سؤال ابنه حول أول وظيفة له. وحكى محمود البزاوي في فيديو نشره عبر حسابه على انستجرام قائلا: «أول مرة أقرر اعتمد على نفسي سبت المحلة وروحت رأس البر اشتغلت في مطعم، قبل ما أدخل المطعم المعلم بصلي من فوق لتحت وقالي تعرف تشتغل يعني، قلت له أنا عنيا ليك يا معلم، قالي طب هات شيشة من القهوة اللي على الناصية». وتابع محمود البزاوي: «روحت أجيب شيشة من على القهوة اللي على الناصية وكوباية شاي جبت له الشيشة قعدت أشد في الحجر طول ما أنا ماشي عشان ميطفيش وأبقى رايح منور كده، هو يشد في الحجر لقاه مطفي قال يمكن الواد مزاجه عالي ولا حاجة، هاتلي واحدة تانية عملت نفس الحركة والحجر أطفى مني». وأكمل محمود البزاوي: «قالي طب روح هات كوباية شاي، روحت جبت كوباية ماية وشاي وقعدت أقلب الشاي عايز أثبت له إني واد صايع وهو كان بيكلم زبون، فجأة الكوباية طقت، دلقت كوباية المايه براحه وحطيت كوباية الشاي في كوباية المايه راحت طقت، قالي أمشي ياض قلت له طيب أديني أجرتي بتاعة اليوم، قالي عليا الطلاق بالتلاتة لو وصفتلي لون المحل من جوا لسيبهولك، وأنا مدخلتوش».