فى حوار من القلب مع الفنان جميل راتب رحمة الله عليه، سألته المذيعة عن حياته قبل الفن خصوصاً أن عائلته كانت أرستقراطية ترفض أن يعمل أحد أفرادها بالفن.
 حضرتك لما سافرت فرنسا اشتغلت جرسون واشتغلت شيال، أنت من عائلة أرستقراطية، غنية ومعاها فلوس تطلع على فرنسا تشتغل الأشغال دى ليه؟!
 «لان أنا كنت رايح فرنسا أدرس قانون، وأول ما وصلت سيبت القانون ورحت أدرس تمثيل، فبعد وقت معين العائلة منعت عنى المصروف ومباقوش يبعتولى فلوس عشان أرجع عن التمثى..ل يعنى هما افتكروا ان ده هيرجعنى وهيخلينى أنسى التمثيل، بس انا مرجعتش وكملت فاضطريت اشتغل عشان أعيش، فاشتغلت كل حاجة تقريباً.. ومن الأعمال المهمة جداً اللى اشغتلها هى انى اشتغلت شيال فى سوق الخضار فى فرنسا لأنى اتعرفت على مجموعة من الناس وشريحة من المجتمع مكنتش هعرفها خالص وأنا عايش فى الطبقة الأرستقراطية اللى نشأت فيها، مكنتش هعرفهم غير فى الفرصة دى، وفتحت فى دماغى أبواب كبيرة لأن كلنا كنا بنشتغل وبنكافح لهدف واحد بس إننا ناكل مش أكتر من كده، كانوا ناس مقبلين على الحياة وعلى شغلهم وبيهتموا بإتقانه والتفكير فيه رغم إنها شغلانة ملهاش أى مستقبل، كل اللى تقدر تجيبه منها هو أكل يومك فقط، فمكناش بنبص لبكرة.. كل تفكيرنا فى النهارده بس.. فلقيت نفسى فى مستوى غير اللى كنت متوقع أبقى فيه، بس ده سمحلى إنى أنظر للمجتمع بطريقة جديدة وأحترم أى حد بيشتغل أى عمل مهما كان بسيط، ولغاية دلوقتى بحترم جداً اللى بيشتغلوا فى الأعمال البسيطة سواء فى فرنسا أو فى مصر أو فى أى بلد، وبحترم فكرة الشغل نفسها حتى لو من أجل الأكل فقط، وحبيت الناس اللى اشتغلت معاهم وبفتخر دايماً إنى كنت واحد منهم.