في أحد اللقاءات التليفزيونية سئل الفنان عبدالمنعم مدبولي عن كيف تتعامل معه والدته بعد الشهرة الكبيرة التي حققها، فسرد علينا قصة طريفة كما عودنا قائلا

-بعد ما حضرتك نجحت فنيا واتشهرت وبقيت معروف ، كان تعامل والدتك مع شهرتك عامل ازاي؟
بص هحكيلك موقف يبين ده ، في أيامها الأخيرة انا كنت دايما أروح ازورها كل يوم في البيت عند أخويا الكبير اللي كانت قاعدة معاه، المهم في يوم كنت عندها ونزلت رحت الأجزاخانة أجيبلها الدواء بتاعها،  جيبتلها كل الأدوية اللي بتستعملها

ولسه هخرج لقيت الأجزاخانة اتزحمت والناس ملمومين حواليا وبيقولوا لبعض "عبدالمنعم مدبولي أهو" ومن كتر زحامهم كسروا إزاز الأجزاخانة وبقيت مش عارف اخرج وحتى لو قدرت اطلع هيعملولي زفة في الشارع وانا عايز اروح لأمي بالدواء، فالدكتور كلم القسم وقالهم ان انا عنده ومش عارف اروح، فبعتولي عربية من القسم خرجت أخيرا وركبت العربية ورحت البيت لأمي بس كنت اتأخرت بقى عليها فقالتلي "انت كنت فين يابني وايه اللي اخرك لحد دلوقتي ؟!" ، قلتلها "الناس وانا في الأجزاخانة اتلموا حواليا" .. قالتلي "اتلموا حواليك ليه ؟ انت عملت ايه يابني طمني، بس فهو ده كان تعاملها مع شهرتي متعرفش أساسا اني مشهور او ان حد يعرفني وكل اللي جه في دماغها لما الناس تتلم عليا يبقى انا أكيد سرقت حد فيهم.