كشف الفنان محمد رياض سبب اعتزاله كرة القدم، رغم احترافه لها فى بداياته، حيث كان يلعب ضمن صفوف نادى «أبو سمبل»، ومقيداً فى الاتحاد المصرى لكرة القدم، تحت سن 19 عاماً. وقال محمد رياض، عبر تصريحات تليفزيونية إنه اعتزل فى سن مبكرة ولم يكمل مسيرته الرياضية بسبب إحدى المباريات، قائلاً: «كنا نادى درجة تانية، تحت سن 17 سنة و19 سنة.. وقتها طلعنا الدورى الدرجة الأولى وبنلاعب الأهلى والزمالك والفرق دي، وإحنا كنا فرقة بلا تمويل، مكنش فيه فلوس وكنا بنشترى الحاجات على حسابنا». وأضاف: «كنا بنلاعب نادى اسمه نادى المية، كنت بلعب باك رايت، فى الشوط الأول الكورة اترمت من ورايا وشايفها عدت من فوقى وبينى وبين لاعب الفريق التانى 5 أو 6 متر قلت هلف براحتى ده مش هيجيبني، فى ثانية مشوفتوش، الواد صاروخ خد الكورة وجاب جول، أول جول جه بسببي». وتابع: «عرفوا بقى إنى مش عارف ألاحق الواد، فيرموا الكورة من ورايا والواد صاروخ، مش عارف أضربه ولا أوقفه ولا عارف أعمل حاجة، ده كان أسرع من محمد صلاح، والله ما كنت بشوفه، بيعدى بسرعة الصاروخ، مبلمحوش، كان خرافة.. خلصت الشوط الأول وطبعاً غيرنى المدرب، مكملتش الماتش دخلت أوضة اللبس وغيرت ورجعت البيت واعتزلت ومروحتش النادى تانى خالص». يذكر أن محمد رياض يشارك فى رمضان 2023 فى مسلسل «المداح... أسطورة العشق» .