أغلقت الفنانة درة باب الخلافات مع زميلتها الفنانة حورية فرغلى، وألمحت لحدوث وقيعة بينهما على خلفية ترتيب الأسماء فى عملهما المشترك فيلم «مصور قتيل» الذى عرض عام 2012، وأكدت درة أنها تتمنى لحورية كل الخير، وواثقة من طيبة قلبها.
وأضافت درة خلال تصريحات تليفزيونية بحضور حورية فرغلى: «ساعات بيبقى فيه سوء تفاهم بين اثنين، وساعات فيه ناس ممكن توقع فى النص، أو ممكن تعمل حاجة مش صح، فأنا متأكدة أن زى ما أنا قلبى طيب هى كمان قلبها طيب ومفيش بيننا حاجة خالص».
وتابعت: «بالعكس، فيه كل احترام وكل حب.. أنا من زمان بتعجبنى كممثلة، يمكن متعاملناش مع بعض كتير لكن أتمنى لها كل السعادة والخير من قلبى، وأكيد إن شاء الله نتقابل ونعمل حاجة حلوة مع بعض».
واعترفت حورية بوجود سوء تفاهم، ووجهت التحية لزميلتها درة، مؤكدة أنها كانت دائمة السؤال عن حالتها الصحية أثناء الأزمة الأخيرة.
وسبق أن كشفت درة حقيقة تصريح حورية فرغلى، بتعمدها عدم وضع اسمها على أفيش فيلم «مصور قتيل» وذلك خلال لقاء تليفزيونى لها. وقالت درة: «لا طبعاً، ربنا يوفقها وربنا يشفيها، والفيلم من زمان ودى مش حقيقة ولا تمت للحقيقة بصلة، وأنا معنديش السلطة دى، وحتى لما بعمل حاجات ببطولات مطلقة عمرى ما عملت كده، وعندى أعمال كتير ونسائية زى سجن النسا، ومعنديش خلافات مع حد».