فى أحد اللقاءات النادرة جداً للفنان محمد عبد الوهاب مع المذيعة ليلى رستم، سألته عن أكثر الأشياء التى يخاف منها، وكانت إجابته غريبة جداً، خصوصاً أنه فنان كبير وسافر إلى عدة بلاد، حيث سألته: * أستاذ عبدالوهاب حضرتك بتخاف من إيه؟ فى حاجة معينة بتخوفك؟ - أنا أموت من الطيارة، شوفى يعنى إيه أموت من الطيارة، يعنى شكل الطيارة كفاية إنى أشوفه مانامش طول الليل، وشرفى بكلمك بجد. * دايماً تسافر فى البحر؟ - آه طبعاً ما هو مش معقول أركب طيارة هركبها إزاى دي؟ أنا عندى مئة سبب وسبب ما أركبش طيارة قوليلى إنتى سبب واحد يخلينى أركبها. * السرعة، فى دقايق فى ثوانى تكون وصلت؟ - طيب ما هو فى دقايق فى ثوانى ممكن أكون فى الآخرة! * أستاذ عبدالوهاب دى ممكن توصلها من غير طيارة ومن غير أى حاجة؟ - لا، بالطيارة دا مؤكد ومضمون. * أنت عارف يا أستاذ عبد الوهاب إن الإحصائيات بتقول إن أقل نسبة حوادث بتحصل فى الطائرات؟ - أنا هسألك سؤال وردى عليه، ولو رديتى عليه هركبها بكرة إن شاء الله، أنا راكب طيارة وفوق فى السما على بعد تلاتين ألف قدم حلو كدا، خطر حاجة على بال السواق يعنى ضرورى أنه يقف فوق شوية كدا على اليمين أو على الشمال يركن زى ما بيركن العربية يركن فين؟ فوق؟ * أستاذ عبدالوهاب مافيش حاجة اسمها ركنة، بيفضل طاير على طول لحد ما يوصل.. إزاى اضطر يوقف.. يعمل إيه؟ تبقى حادثة يعني؟ - أيوه، والحادثة هنا مافيهاش رجوع.