حرص نجوم الفن على إحياء ذكرى وفاة الفنان الكبير علاء ولى الدين، الذى رحل عن عالمنا قبل 20 عاماً، وتحديداً أول أيام عيد الأضحى المبارك من عام 2003، إثر إصابته بغيبوبة سكر وارتفاع فى ضغط الدم.

ونشر النجم محمد هنيدى صورة للفنان علاء ولى الدين، عبر حسابه الرسمى بموقع تبادل الصور والفيديوهات «إنستجرام»، وعلق عليها: «أبو قلب أبيض».

كذلك نشر المخرج مجدى الهوارى، منشوراً عبر حسابه الرسمى بموقع التواصل الاجتماعي «فيسبوك»، وكتب: «قمت يومها من النوم أول يوم العيد على الخبر الصادم، كنت نايم.. وكأنه إمبارح! كان صوته قبل ما أنام آخر حاجة سمعتها يومها!، وآخر جملة قالها: يا مجدى محتاج أنام، أنا راجع من رحلة طويلة ومتعبة، عايز أشوفك أحكيلك هصحى من النوم على صلاة العيد أضحى».

وتابع: «وأكلمك وأشوفك.. إنت واحشنى جداً، ولو صاحى خدنى نتفرج على فيلمك الجديد، فى البدرى أول حفلة زى ما بنعمل.. الفيلم كان (ميدو مشاكل)، طبعا وديه كانت طقوس بنعملها دايما أنا وهو، فى كل فيلم ينزل ندخل حفلة 10 صباحا فى الروقان، وقاللى ونكلم أحمد عبدالله وأحمد حلمى علشان أباركلهم وكمان نكلم شيرين آه يا ليل، وقعدنا نضحك جامد جداً فى التليفون، ويحكيلى عن كواليس تصويره فى البرازيل فيلمه الجديد (بالعربى تعريفة) إخراج عمرو عرفة وإنتاج طارق صيام».

وأضاف: «قاللى قد إيه تعب فى التصوير هناك، ويحكيلى إن الشغل طالع حلو والرحلة طويلة وكان نفسه يطلب فيها مرة واحدة بس (مربى فراولة) من الفندق بس مكنش عارف اسمها إيه بالبرازيلى، وإنه قد إيه مفتقد كواليس شغلنا مع بعض! طبعا لأن ده كان أول فيلم يعمله مع منتج تانى بعد عبود والناظر وابن عز اللى كان حظى حلو أنى أعمله أهم ثلاثة أفلام حياته والبطولة المطلقة، ده غير فوازير أبيض وأسود».

واستطرد: «قمت من النوم عرفت مكلمنيش لأنه توفى بعد ما ضحى، وعمل كل الخير ووزع بنفسه اللحمة، واطمن على أمه وإخواته، واستودعهم الله، الله يرحمه، وفضلت مش مصدق كتير، ولا عايز أصدق، ويومها نزل الفيلم (ميدو مشاكل) أول حفلة اللى المفروض نروحها سوا، بس ملحقناش ومفرحناش، ونجح الفيلم وجاب أعلى إيراد يوم فى تاريخ السينما فى أفلام العيد، واتأكدت بالفيلم ده أن أحمد حلمى ينفع يبقى بطل ويشيل أفلام لوحده بعد ما كل الناس كانت مشككة فى ده!!».

واختتم حديثة قائلاً: «الله يرحمه كان يقولى اعمل اللى عليك، واللى خلانى أنا يا مجدى أبقى بطل يخلى حلمى كمان، وبقت الناس تكلمنى تقوللى البقاء لله فى صديقك علاء ولى الدين، وألف مبروك على فيلم ميدو مشاكل لأحمد حلمى، ومكنتش الحقيقة برد على الأولى ولا التانية!، كنت مذهول! وفضلت والله فى الحالة ديه كتير وفضلت أنتظر إنه يقوم من النوم، ويكلمنى زى ما وعدنى من يومها، اتأخر تليفونك يا لول!! عشرين سنة».

وروى معتز ولى الدين شقيق الراحل، تفاصيل اللحظات الأخيرة فى حياة علاء ولى الدين خلال لقاء سابق له بأحد البرامج التلفزيونية قائلاً: «أثناء تصوير فيلم عربى تعريفة فى البرازيل كنت أكلمه يقولى أنا فى الجنة يا معتز، لما كان بيصور فى جزيرة هناك كان يقولى بقعد أسبح ربنا كتير». وتابع «لما استقبلته فى المطار كان أول حاجة يشوفها هو ابنى خالد اللى كان لسه مولود، جه البيت كان فجر العيد الكبير ووقفة عرفات سلم علينا وعلى ماما واستنينا منمناش عشان نصلى العيد، وكلمنى وقالى أمن على الجزار عشان يدبح على طول، قولتله علاء بقى خش أنت عشان الناس وأنا وخالد هنعمل كل حاجة قالى لا سيبنى والنبى أنا عايز أوزع اللحمة بإيدى».

وأضاف: «بعد كده دخل لوالدتى قالها أنا هنام شوية عقبال ما تعملى الفتة واللحمة، وطلب منى أجيبله جرايد عشان كان عايز يعرف الأخبار، بعدها بربع ساعة دخلت عليه الأوضة لاقيته واقع على الأرض بصحى فيه اتخضيت قولت وقع اتخبط ولا حاجة بحاول أصحيه لاقيته متوفيى، عرفت على طول، حاولت أتماسك عشان والدتى ونزلناه من البيت على إنه عنده غيبوبة سكر مش متوفى».

وقدم نجم الكوميديا علاء ولى الدين خلال مسيرته الفنية عدداً من الأعمال الفنية، أشهرها «الإرهاب والكباب»، والجزأين الأول والثانى من فيلم «بخيت وعديلة»، «رسالة إلى الوالى»، «الناظر»، «ابن عز»، «عبود على »، وله عدد من المسرحيات من بينها «ألابندا»، «حكيم عيون»، «لما بابا ينام».

وكان انتهى من تصوير جزء من مشاهده فى فيلم «عربى تعريفة»، بطولة الفنانة حنان ترك، والراحلة خيرية أحمد، والفنان شريف منير، ومن إخراج عمرو عرفة.