كشفت الفنانة هالة صدقى سر انتشار عدة صور لها داخل أرض زراعية تحمل البصل، وقالت إنها استثمرت مدخراتها فى زراعة وبيع محصول البصل، إضافة لافتتاح مطعم، حتى لا تجبرها الاحتياجات المادية على قبول أدوار لا تناسب تاريخها الفنى، لافتة إلى أنها تقوم بزراعة الأرض بنفسها. وأضافت هالة صدقى، عبر تصريحات تليفزيونية لها: «فتحت مطعم عشان أحافظ على هالة صدقى، ومضطرش أشتغل حاجة مش عجبانى، لأن ده مصدر رزقى الوحيد.. ده مشروع كان لازم أعمله من زمان، لأنى ست (تنكة) فلازم يكون فى مورد تانى». واستطردت حديثها قائلة: «أنا ببيع بصل دلوقت، زرعت فى المزرعة اللى أنا فيها بصل وببيعه، والمزارعين مجوش اليومين اللى فاتوا نزلت أنا شيلت البصل، إيه المشكلة! عمر الشغل ما كان عيب، العيب إنك تمد إيديك». وسبق أن نشرت هالة صدقى مقطع فيديو عبر حسابها بموقع «إنستجرام» وهى تقوم برعاية محصول البصل، وعلقت عليه قائلة: «هو المفروض أتصور وأنا فى أفخم الأماكن وأشيك الأماكن، بس ده الواقع هو كده غلط ما يصحش الناس تشوفنى كده حد محتاج بصل، هو الكيلو بكام.. بصل هالة صدقى». وظن أغلب الجمهور أن الفيديو دعابة من كواليس تصوير أعمالها الفنية.