روى المخرج ماندو العدل كواليس فيلم «البدلة» كاشفاً لأول مرة أن الفنان محمد هنيدى كان سيشارك فيه. وخلال تصريحات تليفزيونية له، قال ماندو العدل: «فيلم البدلة دا كان تامر حسنى ومحمد هنيدى، ومكانش أكرم حسنى، دى أول مرة أقولها فى حياتى، وفى السيناريو مكانوش بيتولدوا فى نفس اليوم أضفناها عشان يبقى أكرم، ومحمد هنيدى كان موافق بس حصل مشكلة مع المنتج فى الاتفاق، وحتى إن محمد هنيدى قال أفكار وأخدناها واستأذنته أخدها، وأكرم حسنى لما قدم الدور نجح نجاح كبير». وحكى ماندو العدل عن كواليس الفيلم وأنه بعدما انتهى منه بكى كثيراً خوفاً من عدم نجاحه وقال: «فيلم البدلة غريب بالنسبة ليا، نوع الفيلم الكوميدى مش ذوقى.. أدخله سينما وأضحك لكن مش بتاعى، معرفش جابونى أعمله ليه، ولما تامر حسنى كلمنى على الفيلم سألته: ليه أنا، كنت خارج من مسلسل (لأعلى سعر) مع نيللى كريم، كان عندى تشكك كبير وأنا بعمله من أوله لآخره أنى هعرف اعمله، وعندى مشكلة أنى اشتغلت مساعد مخرج فى أفلام كوميدى وكنا من أول اليوم لآخر يوم الناس فى الكواليس بتضحك وينزل السينما مينجحش، وأنا بعمل الفيلم الناس بتضحك فى التصوير وكنت خايف، ودا كان تانى فيلم ليا». وعن تقديم جزء ثانٍ من الفيلم، قال: «من أيامها بيقولوا نعمل جزء تانى لكن تامر حسنى وأيمن بهجت قمر انشغلوا فى حاجات» .