كشف الفنان عمرو رمزى، كواليس أول لقاء جمعه بالزعيم عادل إمام، والتحاقه بمسلسل «فرقة ناجى عطا الله» بعد برنامجه التليفزيونى الشهير «حيلهم بينهم».
وقال عمرو رمزى، عبر تصريحات تليفزيونية له: «أول مرة كلمته أنا متكلمتش، هو اللى اتكلم، لقيت رامى إمام بيقولى سيب اللى فى إيدك وخد، فأعطى التليفون للزعيم، فقال لى إنت جميل وشوفت (حيلهم وبينهم) و(حرمت يا بابا)، وهتبقى معانا فى مسلسل فرقة ناجى عطا الله، وبس».
وأضاف رمزى: «كانت فرصة عمرى أن الزعيم عادل إمام يكلمنى، وفى اليوم ده منمتش وفضلت ساكت لحد لما رامى إمام خد منه السماعة، فقال لى تمام يا عم، فقلت له إيه اللى تمام ياعم، فقال لى الأستاذ اللى كلمك، فقلت له طيب اديهولى تانى أكلمه، فرد مش فاضيين نشوفك فى المسلسل، فقلت له طيب أجيلكم البيت؟، قاللى الساعة 12 بالليل هتيجى فين؟ هنشوفك بكرة الساعة 11 فى الشركة، ولما روحت الشركة كنت قاعد بدردش أنا ورامى، فدخل الأستاذ مقالش حتى السلام عليكم، فأنا قلت أكيد اتشلت من الدور وقفل منى ورامى كان بيهزر».
وأكمل: «قلت لرامى إمام أمشى خلاص بقى الزعيم حتى مقالش السلام عليكم لينا وهو ماشى من قدامنا، فقال لى يا عم اصبر بس هو مشغول شوية، فقعدت شربت قهوة وبعدين دخلنا على أوضة البروفة، فالزعيم كان قاعد على الترابيزة بيكلم حد، فقلت له مساء الخير مردش عليا، فقلت لرامى فيه إيه قال لى اسكت، فضلت قاعد ساكت، فالزعيم مرة واحدة قال لى إنت مين؟ وقتها اتخضيت خضة جامدة، ومبقتش عارف أقول ايه».
وختم حديثه قائلاً: «بعدين قلت له رامى اللى قاللى آجى، فرامى قال له يا أستاذ معلش هديله حاجة كده ويمشى، فأنا قلت هيدينى حسنة يعنى ولا إيه، فقلت له طيب يا أستاذ أسيبك علشان واضح إنك مشغول، فقال لى لأ أقعد بطريقته، إيه بقى اللى جابك هنا يا عمرو، فقلت له رامى قالى إحنا بنعمل مسلسل فرقة ناجى عطا الله، ولو بتعملوا المسلسل عموماً مبروك، فقال لى مبروك على إيه يا حبيبى، أما نشوف إيه اللى جابك هنا، وقام برة وراح باصص عليا من الباب وراح قافل الباب، كنت عايز أنط من الشباك، ولكن فى النهاية وافق عليا».