فى ظل نجومية الفنان الراحل نور الشريف، ونجومية بعض زملائه، ومنهم أحمد زكى وعادل إمام، كانت المقارنة دائماً ما تعقد بين الثلاثى، وفى أحد اللقاءات التليفزيونية، تحدث نور الشريف عن ذلك الأمر فال: - أنا مبغيرش من عادل إمام. * بس بتغير من أحمد زكى.. - ولا بغير من أحمد زكى.. لأ. * دائماً فى مقارنة كده بين نور الشريف وأحمد زكى.. - مقارنة بس مش غيرة! طب هقولك حاجة.. كل اللى عمله أحمد «ألف رحمة له» أقل من موهبته.. تصدقى دى؟ يعنى أحمد زكى مش ناصر والسادات.. * طب عادل إمام.. ده أجره أعلى أجر.. - بصى أنا صريح وليا حوار منشور.. أنا اشتغلت مع عادل واسمى اتكتب بعده، فى حين فى أول الأفلام كان اسمى بيتكتب قبله. دى قاعدة فى عالم الاحتراف..اللى أجره أعلى يتكتب الأول.. مع احترام الأجيال الكبيرة. أنا فعلاً مبغيرش.. ونصيحة بقولها لكل الجيل الجديد، اوعى تلعب فى ملعب غيرك. يعنى عادل ناجح أوى ربنا يزيده لأنه كوميديان. طيب أنا مملكش قدرة الكوميديان، بس أملك قدرة تمثيل باللغة العربية بشكل مفيش زميل ليا يقدر يعمله. عندى تميز زى عمر بن عبدالعزيز وهارون الرشيد والمصير، ده نعمة من ربنا ومجهود كبير مش عند كتير من زملائى، فلما يكون عندى هذه القناعة.. أنا مبغيرش.