حكى الفنان أحمد فؤاد سليم كواليس مشاركته بالصدفة فى فيلم «ضد الحكومة» بعدما التقى بالفنان أحمد زكى الذى طلب منه أن يظهر فى أحد المشاهد.
وقال سليم خلال تصريحات تليفزيونية له: «كان لى صديق سورى نجم من نجوم سوريا جهاد سعد، من وقت التخرج متقابلناش ولا يعرف عنوانى أو رقم تليفونى، لكن كان يعرف أنى لازم أروح لمبنى التليفزيون، حجز فى فندق قريب من ماسبيرو، وكل يوم يستنانى أنا أو أى شخص من الدفعة، وبالصدفة فى يوم كنت رايح ماسبيرو وقابلته وأخدنى للفندق».
وتابع أحمد فؤاد سليم حكايته ليكشف كيف التقى بأحمد زكى وشارك فى فيلم «ضد الحكومة»، متابعاً: «أحمد زكى كان عايش فى نفس الفندق، وفى اليوم دا كان رايح لتصوير فيلم (ضد الحكومة)، شفته نازل من الغرفة لابس البدلة وشكله مبهدل كان نايم بهدومه لأنه عايش جوا الشخصية، شافنى وطلبنى فى مشهد فى الفيلم، وقالي: (أنا عايزك فى مشهد هتصوره معايا النهارده فى المحكمة وأنت لبسك كويس)».
وأكد أحمد فؤاد سليم أنه كان يتمنى مشاركة أحمد زكى فى أعمال أكثر لأنه كان فناناً مختلفاً.