كشف الفنان كريم عبد العزيز فى تصريحات له بإحدى المنصات الإلكترونية عن فترة صعبة فى حياته مر بها عندما اكتشف إصابته بـ9 جلطات فى الرئة أثناء رحلته فى إنجلترا، وأخبرته الطبيبة بأنه سوف يموت. وتابع حديثه: «فوجئت تانى يوم برسايل بيطلبوا أنى أروح للمستشفى فوراً، وأنا مش حاسس بحاجة، وصلت لقيت ناس واقفة مستنيانى، وبيسألوا إزاى واقف على رجلى، وقتها كان عندى 36 سنة، دخلت الأوضة مع الدكتورة، وقالت لى أنا آسفة، لكن دا الطب ولازم أقولك.. إنت هتموت». واستكمل حديثه، قائلاً: «كنت عايز أهرب من المستشفى، وطلبت منها إنى أروح أشوف ولادى، قعدت فى المستشفى 4 أيام فى العناية المركزة، وكل الأفكار الغريبة كانت فى بالى، كل اللى بفكر فيه أولادي». واستكمل حديثه: «قررت أشوف دكتور تانى، وفعلاً قابلت،ه وقلت له إنى لو قعدت فى مستشفى هموت. فضل يسألنى إن كنت روحت لدكتور تانى أو مستشفى وأنا أجاوب لأ، مع إن فى إنجلترا الشبكة الطبية مربوطة ببعض، يعنى هو شايف إنى دخلت مستشفى لكن كنت بجاوب (لأ)، لحد ما سألنى بشتغل إيه، قولت له ممثل ومش عايز أقعد فى مستشفى، اتفق معايا إنى مقعدش فى مستشفى، وأخدت الأدوية والحقن فى البيت، والحمدلله، خفيت».