تحدث الفنان كريم فهمى، عن علاقته بشقيقه الفنان أحمد فهمى، قائلاً: «طول عمرنا أنا وأحمد شخصيتنا مختلفة تماماً، ممكن نقعد أسبوع منشفش بعض، بس فى رابط بينا، مفيش حاجة بتبعدنا عن بعض كأخوات.. وأحمد أخويا الكبير أكبر منى بسنتين وشهر، وأنا أهم حد بالنسباله فى حياته». وأوضح كريم فهمى فى تصريحات تليفزيونية، أن لديه حنيناً كبيراً للماضى وذكريات الطفولة، مستطرداً: «بحن لفترة لعبى كورة وفى الأهلى، وبحن للفترة أنى كنت شايف الناس كلها كويسة ومفيش ظلم خالص وأنا راضى بشكل كبير جداً ومش عايز حاجة أكتر من كده، والرضا اللى بيصنع السعادة مش أى حاجه تانية، وأنا بنى آدم متسرع شوية وبحاول أغير من ده». وتطرق فهمى للحديث عن زوجته قائلاً: «أول ما تعرفت على مراتى كنت لسه بعمل أول مسلسل ليا، وهو عرض خاص، وكنت كاتب بيبو وبشير، وكانت حابة أكتر أكون مؤلف مش ممثل، وكانت عايزانى أعيش من غير شهرة، ومع الوقت حبت اللى أنا بحبه، وعندى مشكلة إن قرارتى سريعة»، مؤكداً: «أنا ضد فكرة الديكتاتورية فى البيت، ورأى زوجتى مهم جداً بالنسبة لى، وأحب رأيها فى كل شىء». ومن ناحية أخرى، يواصل كريم فهمى التحضير لفيلم «دماغ ألماظ» وهو اسم مؤقت، من تأليفه، ويشارك فى بطولته مع شقيقه أحمد فهمى، ومن المقرر التعاقد مع باقى النجوم المشاركين فى البطولة قريباً.