فى أحد اللقاءات التليفزيونية مع الفنانة مريم فخر الدين، وكان معروفاً عنها صراحتها الشديدة، سُئلت عن كواليس فيلم «البنات والصيف».. وهل كان به صعوبة فكان هذا الحوار:

* احكى لنا عن المشاكل اللى حضرتك تعرضتى لها وقت تصوير فيلم البنات والصيف؟

- كان فيلم غريب وصعب، لا كان فيه بنات ولا فيه صيف، كنا بنصور فى عز الشتا وكلنا كنا مدامات. الفيلم ده كان أول إنتاج لـ شركة عبدالحليم وعبدالوهاب، وكان معايا فى الفيلم كمال الشناوى وإخراج عزالدين ذو الفقار. الفيلم تصويره كله كان فى عز الشتا ولبسنا صيفى، كنا بنرصرص كلنا من السقعة، وكل شوية يجيبولنا جرادل مياه ويدلقوها علينا ويجيبوا لمبات كبيرة تنشفنا، ويرجعوا يدلقوا علينا مية تانى، ده أنا كويس إنى ما جاليش التهاب رئوى، واللى يضايق أكتر إن عزالدين واخدنا فى مطروح فى آخر الدنيا بعيد، عشان نصور مشهد الانتحار، طب ما ننتحر فى إسكندرية أقرب.