تحدث النجم أحمد حلمي، عن تفاصيل مشاركته فى فيلم «عسل أسود» وعن رفض زوجته النجمة منى زكى لتقديم هذا العمل. وقال حلمى فى تصريحات تليفزيونية: «فيلم عسل أسود منى زكى قالتلى إنى مش هاينفع أعمله ومكنتش مقتنعة عشان إن ده شخص عايش فى أمريكا لأكثر من 20 سنة، وأنا معيشتش هناك، فمش هاعرف أعمله وكمان اللغة». وأضاف حلمى: «الفيلم كان المفروض يعمله عمر الشريف، وأنا كنت هابقى موظف فى شركة، ولكن لما قرأت السيناريو فقلت لخالد دياب إيه رأيك نخليه أكتر عن الشباب، ونلقى نظرة على الشباب اللى هاجر بره، وفكر فى الموضوع وقالى ممكن نعمل كده وبدلنا السيناريو». وتابع: «كل شيء كان يقول إنى منفعش، ولا شكل ينفع، ولا لغة تنفع، ولا تفكير شخص يكون عايش سنين فى أمريكا، وقعدت مع واحد مصرى كان عايش فى أمريكا اسمه آدم، واستعنت بيه فى قراءة السيناريو، وأقوله على المواقف فى السيناريو وأشوف رد فعله وموقفه إيه لو حصل له حاجة من الموجودة فى السيناريو، وعشان كده الفيلم بيعبر شوية عنى لأنى عيشت بره مصر فترة كبيرة بعيد عن بلدى». واستكمل: «أما فيلم آسف على الإزعاج، فهو مرتبط شوية بمشاعرى تجاه والدى الله يرحمه، وحاسس إنى ملحقتش أقعد معاه وقت طويل، ويمكن لما بتمثل حاجة أنت عيشتها بتقدر تعبر عنها بصدق عشان بتكون عيشته وحسيته».