فى أحد اللقاءات التليفزيونية مع الفنانة الراحلة أمينة رزق، سُئلت عن الحب والزواج فى حياتها فكانت هذه المقتطفات من الحوار:

* كأنثى.. ألم يدق هذا القلب أبداً؟
** مش أوى، كنت أهرب.
* إزاى؟!
** أقولك ليه، أنا دخلت الفن غشيمة جداً، ومعنديش أى خبرة فى الحياة، فوجئت بالفواجع بتاعة المسرحيات كلها سببها الرجل، الانتحار، الموت، الطلاق، العيا، المآسى كلها سببها الرجل فى المسرحيات
* اتعقدتى؟!
** جدًا، صديقاتى وزميلاتى فى الفن برضو شفت منهم مآسى من حياتهم الشخصية فى علاقاتهم مع أزواجهم، وكل شوية ألاقيهم جايين يعيطوا ويشكوا، وشعرت بأن فيه إذلال لشخصياتهم. أنا طول عمرى معرفش ده عيب ولا إيه، بس حاسة بكرامتى أوى، محبش أتذل أبداً.. فشعرت إن أنا إذا قادتنى العاطفة دى نحو رجل كأنها تقودنى نحو الذل، فأتعقدت وبعدت كل البعد عن حاجة اسمها حب، كنت لما أبص ألاقى نفسى هضعف أجرى بالمشوار، أرمح وأدشدش هذه العاطفة، كنت دائمًا أسلط عقلى على عاطفتى عشان منذلش، وأفضل بكرامتى لأن حصل فعلاً عندى عقدة نفسية من المسرحيات والأفلام.
* واعتمدتى طول حياتك على نفسك كأمراة؟
** أنا الراجل، أنا المرأة، أنا البنت، أنا الست، أنا كل حاجة وماشية بدماغى.