تحدث النجم أحمد عز، عن تفاصيل حياته الشخصية، وبداياته الفنية، خلال لقائه مع الإعلامى عمرو أديب، فى بودكاست «Big Time». وكشف أحمد عز، عن نوع الفوبيا التى يعانى منها قائلاً: «أنا عندى فوبيا المرض؛ لأن أمى الله يرحمها ماتت وقبل ما تموت كنت عارف هى عندها إيه، ومقولتش لأبويا وإخواتى وده كان طلبها». وتابع عز: «أمى كانت مدورة البيت عادى كانت بتروح تاخد الكيماوى من غير ما حد يعرف وترجع تطبخ فى البيت عادى، وأنا كنت أقرب واحد ليها وقعدت شوفت المراحل دى وبعدها جالى اكتئاب. واستكمل: «بقى عندى متلازمة خوف من المرض، وده بقى طبع عندى ومش هيروح ولكن بتأقلم، وبحمد وبشكر ربنا على النعمة الكبيرة اللى أنا فيها، ربنا يكفينا شر المرض دى أكتر حاجة بخاف منها». وفى سياق آخر، كشف أحمد عز عن أول عمل له قبل التمثيل وكيفية دخوله عالم الفن قائلاً: «اشتغلت فى استقبال الفنادق، واترقيت ووصلت لدرجة عالية واشتغلت سيلز، وفى عام ١٩٩٥، كان مرتبى ٧ آلاف جنيه». وأضاف: بعدها لقيت إيناس الدغيدى تطلب منى المشاركة فى فيلم «مذكرات مراهقة» مع هند صبرى، وطلبت إجازة من الفندق والمديرة رفضت، فقررت أعمل الفيلم وقدمت استقالتى، ولما والدى عرف غضب منى وأصدر فرمان ضدى إنه مش هيصرف عليا.