حرص الفنان محمد شاهين، بطل مسلسل «لحظة غضب» على توجيه الشكر لفريق عمل المسلسل. ونشر محمد شاهين مجموعة صور من كواليس تصوير المسلسل على صفحته على موقع «إنستجرام»، وعلق عليها قائلاً: «مش عايز أشكر حد على قد ما عايز أشكر ربنا أنه خلانى أشتغل شغل أنا بحبه وناس أنا بحبها، وبرتاح فى الشغل يمكن عمرى ما كان عندى شغف أنى أشتغل مع أى منتج زى ما أنا نفسى أشتغل مع مخرجين كتير، وعندى الشغف والطموح أنى أشتغل معاهم». وأضاف: «أنا أقر وأعترف بأنى بحب الشغل مع طارق الجناينى جداً، وأتمنى أنى أشتغل معاه لحد ما يخلص مشوارى على خير إن شاء الله». وأوضح: «فى الحقيقة دى أول مرة أقابل زيزو أو عبدالعزيز النجار، أو رمانة الميزان، من أول يوم قابلته فى بروڤة المسلسل.. كلمت طارق وقولته إنه مبسوط أوى.. ومن أول يوم شغل لحد آخر يوم وزيزو مصدر ثقة وأمان وتشجيع ويارب أشتغل معاك كتير ولتالت مرة ربنا بيكرمنى بالشغل مع صبا، وهى أحلى وأصدق وأبسط صبا فى الدنيا.. ربنا يحميكى يا صبصو». وتابع: «تشرفت أنى أشتغل مع الممثلين الجامدين اللى كنت معاهم من غير ترتيب والله ولا أى حسابات، أنا عشقت الشغل مع سارة عبدالرحمن وأصلاً أنا بحب عبدالرحمن محمد، وبموت فى صفوة وأنبسط أوى أوى أوى بالشغل مع ريم خورى، وأحلى حاجة فى المسلسل آدم، وكان نفسى يكون عندى مشاهد أو شغل أكتر مع على وناردين، بس تتعوض إن شاء الله». وأوضح: «أنا حقيقى كان ليا الشرف أنى اشتغلت مع العظيم محمد عبدالرؤوف، مدير التصوير، وكل قسم التصوير نفر نفر، عايز أشكر كل أقسام الصوت والإخراج والإنتاج والملابس على تعبهم معانا طول فترة الشغل ومعتقدتش أنى محتاج أقول آسف لحد عشان أنا مبعرفش أزعل حد.. وأشوفكم على خير كلكم». واختتم منشوره قائلاً: «فى الآخر أحب أشكر كل الناس اللى شجعونا وحبونا، وكل سنة وإنتوا طيبين».