تحدث الفنان محمد محمود عن نجاح مسلسله «أعلى نسبة مشاهدة»، الذى عُرض خلال النصف الأول من موسم رمضان الحالى. وقال محمد محمود، عبر تصريحات إذاعية له: «عرض حلقتين من مسلسل أعلى نسبة مشاهدة قبل رمضان بيوم، زى ما يكون بتجرى ريق الناس وتقوليلهم شوفوا المسلسل دا، أعتقد لو مكنش حصل دا كنا هنتعب، فى ظل المنافسة الكبيرة ومنطق السوق إحنا معندناش سوبر ستار اللى الناس تستناه، الناس فى رمضان بيبقوا مجهزين نفسهم هنتفرج على فلان وفلانة». وأضاف: «الحلقتين اللى اتعرضوا من مسلسل أعلى نسبة مشاهدة قبل رمضان خلوا الناس يتعلقوا بيه، لما قعدت فى البروفات مع مخرجة أعلى نسبة مشاهدة كنت عارف إن العمل دا هينجح، وقولتلهم هنبقى الحصان الأسود لأن الموضوع اللى بنقدمه مهم وخطير، لكن تفاجأت إننا نجحنا من أول يوم عرض المسلسل، لأنى كنت فاكر إن النجاح هييجى فى الآخر». مسلسل «أعلى نسبة مشاهدة» بطولة سلمى أبوضيف، وانتصار، ومحمد محمود، وإسلام إبراهيم، وأحمد فهيم، وفرح يوسف، وليلى أحمد زاهر، وآخرون، ومن تأليف سمر طاهر وإخراج ياسمين أحمد كامل.