حلت الفنانة الفنانة غادة عبد الرازق ضيفة على أحد البرنامج التليفزيونية، وصرحت من خلاله عن سر تحمسها للمشاركة فى مسلسل «صيد العقارب» الذى نافست به فى السباق الرمضانى المنقضى قائلة: «إن أهم ماجذبنى فى شخصية « (عايدة) فى مسسل (صيد العقارب) أنها شخصية جديدة وتحمل ملامح كثيرة وتشبهنى فى الحقيقة، وكنت دائماً أحاول أن أثبت لأهلى ووالدى إنى أقدر أعمل أى حاجة وأن مش معنى أنى ست أن الراجل يبقى أحسن منى ولقيت فى كتير جداً من شخصية عايدة». وعن طيبة الشخصية قالت: «الطيبة ملهاش علاقة بالشخصية القوية، حسبة الناس فى الحتة دى غلط». وتابعت: «فيه ناس بتخلط كتير فى الحتة دى، مش معنى إن الشخصية طيبة ولها شخصيتها واحترامها وكيانها وأن يكون لها قرار وتستطيع أن تقود بيت وعيلة وبنت وأحفاد يفكروا فى المقابل أن لازم تبقى الشخصية دى شريرة ومعندهاش قلب ومش بتعرف تعيط، وده غلط وخلط فى الأوراق مع الست». وعن وجود الرومانسية فى المسلسل تابعت غادة: «ماينفعش الناس يبقوا شايفنى من جانب واحد فقط لاغير، وهو إن لازم غادة عبد الرازق تطلع فى دور اللى بينتقم وبتشد شعر كل اللى موجودين فى المسلسل، وتكسب كل اللى حواليها فى المسلسل من رجالة وستات». مواصلة: «أنا مش عايزة الجانب الواحد بس، عاوزة الناس تشوف غادة عبد الرازق فى شخصيات كتيرة، كممثلة أحب أتشاف فى أدوار وشخصيات كتيرة، وأنا مش معقول كل ما أطلع فى دور هيبقى الشخصية القوية اللى بتكسر كل اللى حواليها».