ترك الفنان تامر ضيائى، وصيته عبر حسابه الشخصى على «فيسبوك»، وذلك بعد أيام من دخوله الرعاية المركزة، إثر مشاكل بالقلب، وإجراء قسطرة وتركيب دعامات، لذا فاجأ عائلته وأصدقاءه بالوسط الفنى، بوصية طويلة، فى رسالة إنسانية مؤثرة. واستعرض تفاصيل الوصية، بقوله: «صلاة الجنازة أهم من العزاء، وهى إللى كل ما العدد زاد كل ما ثوابى ما كان أكتر، فأرجوكم تصلوا عليا.. مش شرط تيجى العزاء وياريت لو اتعمل فى البيت أو مكان بسيط بفلوسه تطلعولى صدقة جارية أفضل.. من فضلكم لم يثبت أو يتفق عليه عمل خاتمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش وادعولى الوقت إللى هتقروا فيه جزء فضوا نفسكم واقعدوا ادعوا فيه». وتابع: «بلاش صدقة جارية تقليدية وسهلة، ومش مستفاد بيها، يعنى المصاحف كتير فى مصر أوى وكل بيت فيه كتير، فممكن نحط الفلوس فى جامع بيتبنى أو كرسى متحرك فى مستشفى يستفادوا بيه المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة.. دى نقطة مهمة أوى بالنسبة ليا.. محدش يقول لحد بتعيط عليه ليه، ومتعيطش عشان هو بيتعذب!! الكلام ده غلط، سيبوهم يعيطوا لحد ما يطلعوا كل الشعور إللى عندهم ومفيش حاجه بتقول إن العياط معناه عدم رضا بقضاء ربنا.. وأبيضت عيناه من الحزن فهو كظيم». وأضاف الفنان تامر ضيائى، قائلاً: «أهم حاجة تانى هى الدعاء وبس والصدقة.. من فضلكم تكثفوا الدعاء وقت نزول القبر وتتصدقوا بأى حاجة بنية إن ربنا يجعل قبرى روضة من رياض الجنة ويثبتنى عند السؤال، لأن ده أهم وقت ليا وياريت كمان بعد ما تدفنونى تقعدوا معايا شوية ومتستعجلوش تمشوا عشان تونسونى فى ليلة زى دى.. الموت علينا كلنا حق، وإحنا كلنا أمانات ربنا وهيردنا تانى، فالحزن على الفراق هونوه على نفسكم بالدعاء ليا عشان أبقى فى سعادة لحد ما أقابلكم تانى.. إللى بيحبونى يدعولى كتير عشان لو مفيش حد يدعيلى.. ودى مهمة أوى أوى أوى، عاوز الكل يسامحنى على أى حاجة عملتها فيه بقصد لو بدون قصد».