مثلما كانت معروفة بأناقتها ،كانت معروفة بشياكتها في اختيار أدوارها ايضا .. هي الفنانة الراحلة " رجاء الجداوي" و التي كان لابنتها أميرة السبب الكبير في تغير مسيرتها الفنية تماما.. إذ صرحت رجاء في أحد اللقاءات التلفزيونية عن هذه القصة قائلة:"لما كنت بعمل أحلام الفتى الطاير، كانت أميرة عندها ٣ أو ٤ سنين، ودوري في المسلسل كان دور زوجة خاينة ،خانت جوزها الفنان عمر الحريري واتجوزت بعدها الفنان زين العشماوي الله يرحمه وسابت بنتها الصغيرة تموت و راحت شهر عسل مع جوزها الجديد ، بعدها كان عندى اجتماع مجلس آباء في مدرسة بنتي، فروحت المدرسة وكان في طفل جاي يجيب لي وردة لقيت بنت قالتله لأ لأ دي وحشة، دي شريرة، متديهاش الوردة .. أنا اتخضيت، قلتلها ليه بس يا حبيبتي بتقولي كده ؟ قالتلي انتي شريرة ، و دى طفلة .. متقدرش تزيف مشاعرها ". و تكمل رجاء : "رجعت البيت يومها منهارة و زعلانة .. حكيت لأميرة، قالتلي ، أيوه يا ماما كلهم بيقولوا عليكي شريرة علشان انتي سبتي أونكل عمر واتجوزتي واحد تاني و سبتي بنتك تموت " .. حزنت جدا قلتلها بقى الأطفال بيقولوا عليّ أنا كده ؟! "في الوقت ده جالي مسلسل أوراق الورد و كانت الفنانة وردة المفروض في الدور عندها ولد وبتطلق وجوزها بياخده وبيتجوز مراة أب، اللي هي أنا وبعذب في الطفل ده ، قلتلهم لأ أنا مش هعمله .. قالولي ليه ؟ قلتلهم بنتي قالتلي إني أنا شريرة ، مقدرش ، و من يومها بقيت أحط في اختياراتي إيه اللي ممكن يسيء لبنتي أو يضايقها .. أختار إيه ومختارش إيه .. ساعات بعد ما أميرة كبرت كان يجيلي دور آخد رأيها فيه تقولي لأ مش شايفاكي فيه .. أقولها يا أميرة ما أعمله ده الدور كبير وممتد وماديا كويس .. تقولي يا ماما ده شرير وهيفضل طول عمره موجود من فضلك بلاش ، فأسمع كلامها " .