في أحد اللقاءات التلفزيونية مع الفنان الراحل " عزت أبو عوف" وكان واضح عليه الحزن الشديد بسبب وفاة زوجته ، فسأله المذيع عنها : قيل أن عزت ابو عوف' خس و تعب' بسبب حزنه على وفاة زوجته ..هل هذا حقيقي؟ فقال أبو عوف :" مافيش راجل زعل على مراته قدي دي حقيقة " - بس أنا ماكنتش اعرف انك بتحبها اوي كدا = ولا انا كنت أعرف ،بس لما راحت حسيت اني جوا غسالة و بتلفني في الدنيا كدا، لأني كنت معتمد على فاطيما زيادة عن اللزوم في حاجات كتير ، يعني مثلاً كنت أقولها احنا بكره هنسافر باريس و أسيبها و أنام و هي بقا تخلص كل حاجة من أول التذاكر لحد الأوتيل اللي هنقعد فيه - كنت بتحس بقيمة اللي هي بتعمله عشانك؟ = لا كنت حاسس انه ده العادي و انه ميستحقش تقدير بس لما مبقتش موجودة حسيت بالفراغ و الفضا و الهزة و النقص و مكنتش عمري أفكر إني هبقا كدا من غيرها. - يعني انت فعلاً تعبت بسبب وفاتها؟ = اه نص التعب اللي انا فيه ده بسبب إني بعد ما هي راحت أنا فضلت أعذب نفسي و أجلـد نفسي 3 سنين على أي حاجة زعلتها مني .. الله يرحمها هي محدش جه ولا هيجي و لا موجود حد زي فاطيما.. كان نفسي أعوضها عن حاجات كتير بس أنا عارف اني معوضتهاش بس انا عارف انها هتسامحني عشان هي كانت طول عمرها أحسن مني.