كشفت الفنانة كندة علوش أنها لن تسمح لأولادها بالتواجد عبر مواقع التواصل الاجتماعى إلا بعد سنوات عندما يقررون هذا الأمر بأنفسهم. وقالت كندة علوش، عبر تصريحات تليفزيونية لها: «أخدنا قرار ابتعادهم عن مواقع التواصل الاجتماعى مع بعض من غير ما نتفق، مقعدناش واتكلمنا، بس أنا مش بعرض حياتى الشخصية ولا عمرو يوسف بيعرض حياته الشخصية على مواقع التواصل الاجتماعى، ولما جم أولادنا بشكل طبيعى مكنوش جزء من الموضوع، لما يكبروا ويقرروا، يعنى لما يكون عندها 16 أو 18 سنة وتكون مسئولة عن قرارها». وتابعت كندة علوش: «أنا بنتى عندها 6 سنين وابنى سنتين ونص، مش عارفة لما يكون عمرها 12 سنة إيه الصراعات اللى هخوضها معاها فى الموضوع دا، أنا أتمنى أنها تكون جاهلة تكنولوجيا ومتمسكش موبايل، مواقع التواصل الاجتماعى أياً كانت إيجابياتها هى مكان سلبى للأطفال، بزعل من كل أهل سواء نجوم معروفين أو لأ بيخلوا أولادهم معروضين على مواقع التواصل الاجتماعى، مش كل الناس أسوياء فى ناس متنمرين، أنا طول ما أنا قادرة أمنع أولادى حتى لو كنت أم ديكتاتورية، وهحاول أخلق لهم بدائل تعوضهم عن المتعة اللى بيوصلولها فى مواقع التواصل الاجتماعي».