شاركت الفنانة رحمة حسن، جمهورها صورة جديدة من أحدث ظهور لها، على حسابها عبر موقع التواصل الاجتماعي "إنستجرام".

وظهرت رحمة بإطلالة أنيقة، مرتدية فستانا باللون الأسود، وأما من الناحية الجمالية اعتمدت على مكياج يبرز جمال ملامحها وأنوثتها، وشعر منسدل يتناسب مع الإطلالة، ونالت إعجاب الجمهور.

وفي وقت سابق، كشفت الفنانة رحمة حسن، تفاصيل أزمتها مع المنتج هاني أسامة، والتي بدأت منذ 3 سنوات، مع مشاركتها في مسلسل "سابع جار"، والذي عُرض 2017، بمشاركة دلال عبد العزيز، شيرين، أسامة عباس، هاني عادل، تأليف هبة يسري، وإخراج أيتن أمين.

ونشرت صورة، عبر "إنستجرام"، وقالت: "كل الاحترام والتقدير للدكتور أشرف زكي، على استجابته وسؤاله، وأحب أن أوضح أن الفلوس اللي لي عند هاني أسامة المنتج، هي باقي أجري عن مسلسل سابع جار، وكان لي جزءًا كبيرًا منها، ولجأت إلى الدكتور أشرف في 2019 علشان يساعدني، وحصل، وأعطاني جزءًا بسيطًا من فلوسي، وللعلم الوقت ده كان بابا تعبان وفي المستشفي، وهاني أسامة كان عارف، وقلت له إني محتاجة الفلوس أرجوك".

وأضافت: "رفض بعدها يديني أي فلوس من باقي أجري، ومكنش بيرد على رسايل أو مكالمات مني، للأسف بابا توفي بعدها بكام يوم، ومن ساعتها وأنا تعبانة ومش ناسية هو عمل معايا إيه، وكان صعب أني أطلب تاني من الدكتور اشرف أن يتدخّل، لأن هاني مش بيستجيب أصلًا، وأنا كنت تعبت من كتر ما بطلب حقي وهاني بيتهرّب، بس بين كل فترة والتانية كنت ببعتله رسالة او أكلمه، وبرضوا مافيش حاجة".

وتابعت: "كل ده بمنتهى الذوق والاحترام، والرسايل موجودة معايا من 2018 كله على التليفون، وطبعًا الوقت بيعدي وأنا معنديش شغل ماعنديش دخل، تعبت وبعتله تاني من كام يوم، وقلت له وبرضوا مافيش حاجة، وكمان العقد بتاعي معايا ومخصوم منه الضرايب اللي دائما بدفعها على أي عمل بشارك فيه من زمان، العقد بتاعي على مسلسل 60 حلقة، هاني صوّر وذاع 67 حلقة يعني ليا كمان 7 حلقات، مش موجودين في عقدي وماخدتش عليهم كمان أجر، وماطلبتش بيهم أصلًا بس هو عارف، الفكرة أنه طلع أن في كذا شخص في الشغل مش انا بس، عندهم نفس الموقف مع هاني، ويمكن بفلوس أكتر بكتير وفي نفس الموضوع والنقابات والقضية وما إلى ذلك".

وأضافت: "أما بخصوص إن الدكتور أشرف طلب مني اني اروحله النقابة عشان نتكلم في الموضوع، أنا قلت له إني مش عايزه أتعبه أكتر من كدا معايا، خصوصا اني عارفه أني مش نقابية، واني بشتغل بتصاريح ومش عايزه اضيع وقته، خصوصا انه ساعدني قبل كدا،.. وكمان عشان عارفه ان هاني مش بيستجيب، عشان هو منتج فا تبع نقابه تانيه، .. وكنت عارفه ان الدكتور اشرف كلمه قبل كدا في موضوع الفلوس ده، و برضوا ماحصلش حاجه، .. يعني لو كان عايز يدفع كان دفع من زمان، .. المسلسل اتذاع وخلص وهاني عمل بعده كذا عمل، انا قلت للدكتور اشرف اني مش هاقدر اجي لاني تعبانه، واني مش هاشيل البوست لحد ماخد فلوسي .. لاني بحاول اجيب حقي الي بقالي ٣ سنين مش عارفه اجيبه".

وختمت: "شكرا لكل حد اهتم .. بس انا حبيت اوضح ايه الي بيحصل .. وشكرا لكل الي ساعد والي بيحاول يساعد ..،وللعلم انا لسه ماخدتش فلوسي برضوا .. شكرًا".