شعر: فؤاد حداد
اصحي يانايم.. اصحي يانايم
وحد الدايم
مسحراتي بقول .. يا حلول
إيدي طبلة علشان تنقر
وفي إيدي سكر علشان تحلو
ياولاد حارتنا إيدوا الفانوس
ياطبلة يامنقرشة
لمي العيال من عالعشا
خليها ليلة - ليلة فرفشة
طرقع صاجاتك ياعرقسوس
ياطبلتي دقدقي وياطيرة زقزقي
النور شقي قاعد يشك الضلمة بالدبوس
والبت توحة تقولي النوحة
وتقول ياجدو يأبو شنب شنبوس
شنبك مشوك كل ما آجي أبوس
الواد حسن كلبوظ فتح قميصي
وشد كيسي وشد كيسي مالقاش فلوس
أنا اللي جاي أول سنة في ميعادنا
قلبي يطبطب عالببان ويبوس
يامصري ياللي شمعتك مادنة
وكل جامع فانوس
وكل جامع فانوس يرسم ضلي أجمل مني
لو تفرشولي الورد عالاعتاب
لو تفرشولي الورد عالاعتاب
علي قد حبي تبقوا ظالمني
اصحي يانايم.. اصحي يانايم
وحد الرزاق
رمضان كريم
للطبلة دقة وفي قلبي دقة
ياللي سامعني ماتقلش لا
ولا اللي ماشي ماشي في شارع الفوانيس
وقلبي «أوضة» في صنع الأحاسيس
من صغري لحد عز شبابي
قلبي فتح ولكل أحبابي
وفتحت للنسمة زرار القميص
اصحي يانايم .... اصحي يانايم
وحد الدايم
اصحي يانايم .. يانايم اصحي
وحد الرزاق
اصحي يانايم .. يانايم اصحي
وحد الرزاق