صدر حديثًا عن دار الشروق للنشر والتوزيع، كتاب «الخروج عن النص.. من جديد» للدكتور محمد طه، بالتزامن مع معرض القاهرة الدولي للكتاب في دورته الـ53، وتنطلق فعالياته في الفترة من 26 يناير الجاري، وحتى الـ7 من فبراير المقبل.

ويقول محمد طه عن كتابه: «فيه ميراث بيتم توزيعه وقت الولادة..

بمجرد ما حضرتك تتولد.. بتبدأ في استلام تركة ثقيلة وممتدة من كل أجيال أسرتك، دول يسلِّموك مخاوفهم.. ودول يسلِّموك نقط ضعفهم.. ودول يسلِّموك نصوص حياتية مُعدة مسبقًا..

إحنا محتاجين نقف وقفة حاسمة وجادة.. نراجع فيها كل ما تسلمناه..

محتاجين نخرج عن النص.. ونبدأ في الكتابة من جديد.. بأقلامنا نحن..

تم نشر كتاب «الخروج عن النص» سنة 2015..

واليوم.. وبعد ست سنوات من الوعي.. تحول كتاب «الخروج عن النص» الأصلي إلى الباب الأول في هذا الكتاب.. والذي يحمل الباب الثاني منه اسم «العودة إلى الحياة».. والمكون من اثنا عشر فصلًا جديدًا..

 في الباب الأول «الخروج عن النص»، هنعرف يعني إيه حدود نفسية.. وإيه هي نفسك الحقيقية ونفسك المزيفة.. وليه بنكرر أحيانا نفس الغلطة..

هننتعلم عن المواقف غير المنتهية.. والمشاعر اللي بنحسها.. بس هي في الحقيقة مش مشاعرنا..

هانكتشف ازاى ممكن نكون عايشين نصف حياة... وايه الأدوار اللي بنلعبها في سيناريوهات حياتنا.. وإيه هو أقوى سلاح في تاريخ البشرية..

وفي الباب التاني «العودة إلى الحياة».. هانتكلم عن الصوت الداخلي اللي بيطلع من جوانا، ويرسل لينا رسايل صعبة، تفسد علينا طعم الحياة..

هانستعرض بالأمثلة بعض القرارات اللي بناخدها واحنا صغيرين، واللي بتتغير معاها حياتنا للأبد..

هانتكلم عن الانتحار.. وإيه معنى إن حد يقرر ينهي حياته..

هانشوف الخوف من الهجر والوحدة ممكن يعمل إيه في أصحابه..

هانفهم اختياراتنا بتقول عننا إيه..

وهانعرف ازاي مانخليش احتياجاتنا.. تبهدلنا..

ياللا بينا نخرج عن النص.. في اتجاه النور..في اتجاه الحياة».