تصدّر اسم المطربة زيزي عادل، قائمة الأكثر بحثًا على محرك جوجل، وذلك بعد إعلان اعتزالها الغناء، مؤكدة أنها كانت تفكر في هذه الخطوة منذ فترة، وطرحت الأمر على عدد من المقربين منها، والذين شجعوها على ذلك.

وقالت في مقطع فيديو نشرته عبر "إنستجرام":"أنا النهاردة طالعة أقول خبر مهم أخدته في حياتي وهو قرار اعتزالي، قررت أسيب مهنة الغناء، والقرار أنا مخدتهوش امبارح أنا وخداه من فترة كبيرة جدا، بس يمكن مطلعتش قلت وقتها لأني كنت حابة أتكلم مع نفسي ومع الناس القريبة أوى".

وأضافت: "الناس القريبة مني عارفين نفسهم ولما قلتلهم على القرار شجعوني ودعموني كمان، ويمكن قرار الاعتزال ده بيبعدني عن أكتر مغريات الحياة وهي الشهرة والأضواء".

وتابعت: "أنا ببعد عن الفن عشان بقرب من ربنا، والفترة اللى فاتت قربت من ربنا جدًا، ولقيت إن القرآن بيقولي إني لازم أكون ست ملتزمة، وبحاول على قد ما بقدر أكون ملتزمة وهتستغربوا شوية إني طالعة بشعرى ومش محجبة، ويمكن ده لأني لسه ربنا لم ينعم عليا بالحجاب، وبدعي ربنا يتممها عليا، وكل حاجة بتيجي خطوة خطوة ومفيش حاجة بتيجي مرة واحدة".

واستطردت: "أنا عاوزة أقول كمان الفن هو مصدر دخلي ورزقي، وأنا بسيب حاجة بعيش منها وسيبتها وعارفة إن ربنا هيرزقني، وأنا راضية جدًا عن قراري ومبسوطة جدًا بيه وحابة اللي جاي جدًا وحاسة إن حياتي اختلفت تمامًا".

وأوضحت: "يمكن لما أخدت القرار تعرضت لمواقف واللى تسمى اختبار من ربنا وكان اختبار صعب والإنسان ضعيف، لأن جالى عرض مجاليش وأنا بمارس مهنة الغناء، ولكن الحمد لله ربنا كرمنا وقدرت ارفض من دعم من ناس حواليا".

وأكملت: "أنا مش عاوزة أدخل في حتة إن الفن حلال والفن حرام، عشان مبقاش طالعة إنى داعية أنا طالعة بتكلم عن نفسى، وإنى بطلت أغنى ودينى بيقولى كده وكل واحد حر في حياته".

وختمت: "أنا حابة أموت وربنا راضى عنى ويمكن دى حاجة كلنا بنتمناها، فأنا مش عارفة هاموت امتى ولكن كل اللى عوزاه أكون مستعدة لمقابلة ربنا وأقابله وأنا راضية عن نفسي وحياتي وأفعالي، والحمد لله ربنا كرمنى والتزمت، وربنا يكرم التزم اكتر وادعولى ان ربنا يثبتنى على اللى انا فيه".

 

 

 

 

View this post on Instagram

 

 

 

 

 

 

 

 

 

 

 

A post shared by Zeezee Adel زيزي عادل (@zeezee_adel)