أعرب الكاتب والمؤلف والمخرج المسرحي محمود جمال الحديني عن حبه الشديد للزعيم عيد إمام، كما هنأه بمناسبة عيد ميلاده الـ82، والذي يوافق غدًا الثلاثاء 17 مايو.

ونشر محمود جمال الحديني عبر صفحته الرسمية بموقع التواصل الاجتماعي "فيسبوك" صورة لعادل إمام، وعلق عليها قائلًا: "أنا بحب عادل إمام.. من وأنا صغير قوي وأنا بعشق الراجل ده.. وبعشق كل الناس اللي هو جسدهم اللي هما تقريبًا كل الناس.. بعشق الحرامي والمحامي والهلفوت ورئيس مباحث العاصمة والإرهابي والمشبوه ولعيب الكرة المشهور ولعيب الكرة الحريف والصحفي والغلبان والموظف والمنسي والزعيم".

وأضاف محمود جمال: "وتقريبا ناس كتير قوي حبتهم لأني عرفتهم لما حبيت عادل إمام.. يعني أقدر أقول إني من قبل ما أكبر وأعيش الدنيا ويكون ليا تجربة كنت بعيش تجربته في أفلامه.. تعلمت الغضب لأبعد حد والخوف والهروب والضحك والألم والسخرية والابتسامة.. أه من ابتسامة عادل إمام بجمالها وصفائها وطيبتها ابتسامته اللي كتب عنها الكاتب الكبير خيرى شلبي إنها قريبة من الناس.. بتحسسك أنه مننا وزينا وراجل طيب".

وتابع محمود جمال قائلًا: "عادل إمام مش بس شباك تذاكر لأفلام ناجحة.. عادل إمام سينما.. أفلامه بيبدع فيها الكتاب والمخرجين والممثلين اللى معاه والموسيقيين.. تقريبا كل فيلم عمله هتفتكر موسيقاه.. هتفتكر جمله وكادراته..ولو اتكلمت عن كل فيلم لو حده الكلام مش هيخلص التجاري والسياسي والرومانسي والثوري والكوميدي.. والإنساني ... عادل إمام لما بيحب فى أفلامه بتحس أنه بيطمن اللي قدامه وبيحبه عشان يحميه ويطمنه.. لما بيحضن ابنه أو بنته أو أمه أو أبوه بتحس إنك عايز تعمل زيه وتوصل لدرجة الدفا والحنية دى".

واستطرد محمود جمال: "أنا حبيت الفن من حبى ليه ومنه بدأت أحب كل النجوم  وكل الفنانين وكل الأفلام.. عادل إمام مش بس الفنان اللي بشوفه فى التليفزيون أو فى السينما.. أنا بشوفه فى ضحك وهزار الناس.. فى أمثاله وجمله وإيفهاته اللي لسا عايشة ما بينا .. فى ريأكشناته اللي طبعها فينا.. عادل إمام وشوشه وريأكشناته وردود أفعاله أكتر من ايموشنز الفيس بوك.. وده يعرفك قد فيه ريأكشن لكل تعبير.. ريأكشن كان فاهم من زمان السوشيال ميديا وعارف أنه هاييقى الكومكس اللي بنعبر بيها عن مواقف حياتنا".

واستكمل محمود جمال الحديني: "أنا بحب عادل إمام وعارف ـنه حبني وحب كل جمهوره.. لأن صعب كل الناس دي تحب واحد إلا اذا كان هو كمان بيحبها..  لدرجة أنه بقى صوتهم وممثلهم ونجمهم .. أنا ماعرفش الناس كانت بتلبس جينز وهو قلدهم .. والا إحنا اللي قلدناه....  يا ريت الجيل القديم يقولنا مين خد من مين".

واختتم محمود جمال قائلًا: "عادل إمام من غير ألقاب لأن كلمة عادل إمام لوحدها لقب وزعامة وأستاذية وأنا لو ها كتب مش ها يكفيه كلام.. أنا بحبه ومديون له بحبي لشغلتي وهوياتي.. كل سنة وأنت طيب يا عادل ووحشتنا".