كشف الفنان تامر حسني، عن بعض الصعوبات التي واجهته في طفولته، منها وفاة والده، وهو الأمرالذي استدعى ضرورة انخراطه بالمجال العملي وعمله في بنزينه"، وسوبرماركت، وغيرها من الأعمال، وذلك دعمًا منه لجمهوره الذي يسعى للنجاح.

ونشر تامر حسني عبر صفحته الرسمية بموقع تبادل الصوروالفيديوهات "إنستجرام" صورة لمنشور سابق له، وعلق عليه قائلًا: "قرأت معظم التعليقات على قد ما قدرت على آخر بوست ليا اللي فوق دا.. وفهمت أكتر حاجتين من تعليقاتهم عاملين إحباط لمعظمكم، اليأس من النجاح، إحباط المقربين، وبعضكم واصل لفقدان الأمل والشغف وبعضكم فاقد الأمل في الحياه نفسها".

وأضاف تامر حسني: "هطلب طلب منكم قبل أي شئ افتكروا معاناتي في بدايتي وظروفي الصعبة من غير أب، ومن غير أي فلوس، وبنزل اشتغل في الشوارع من عامل بنزينه لسوبر ماركت لفاعل،  يعني اللي بيبنوا العمارات بطلع طوب وأسمنت، عشان أرجع بيتي لأمي الغلبانة بأي خمسة جنيه بالإضافة لمرتب النادي لما كنت بلعب كوره كان مرتبي ٢٢ جنيه في الشهر".

وتابع تامر: "منهم بقى تحويشة الميه والكهربا وعمليات أخويا عشان كان عيان لفترة كبيرة كنت بعمل المستحيل فعلاً عشان أمي وأخويا وعشان أوصل لهدفي، كان جوايا سعي دائم لطريقين الكورة والغناء وبقول دا عشان ناس كتير عايز أنصحها بالخطة البديلة عشان لو الحلم مجاش يكون في غيره زي ما أنا كان نفسي ابقى لاعب كرة والكرة مش ليا".

واستطرد تامر حسني: "والأنديه كلها مشوني رغم تفوقي كنت بسأل نفسي ليه الأبواب كلها بتتقفل في وشي أتاريها بتتقفل عشان توجهني لمسار آخر ولما آمنت بكده فهمت قدام أن ربنا كان شايلي الأحسن ليا بس ساعتها مكنتش فاهم.. واللي بيسأل نفسه دلوقتي يعني أنا أكمل في حلمي ولا أشوف حلم تاني هقوله دايماً، أطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكدلك تكمل أو لا بس اجتهد واتعب عشان المجهود دا ليه كرم متحوشلك في مجالك التاني ف أوعى تقول تعبت عالفاضي".

واستكمل تامر: "وبالنسبة للمحبطين هيفضلوا موجودين أنت اللي بتسمعلهم وأنت اللي بتسمح إنك تتأثر بيهم أمنع دا فوراً، متبقاش السبب في آذية نفسك متتشدش غير لكل جميل ولكل إيجابي هتلاقي كل الحلو بيجيلك ومتعملش العكس عشان هيجيلك برضو عشان كدا بقولك أنت السبب دايماً قول يارب واجتهد وأفهم إن الراحة المطلقه في الجنة بس وإحنا على الأرض".

واختتم تامر حسني: "و ربنا قال إنه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتيرقبلينا كانت ظروفهم أصعب ووصلوا يبقى الموضوع فينا متبقاش أكبرعدو لنفسك أنت السبب خد قرار صارم فوراً في التغيير والنهوض والنجاح.. والله هتوصل.. متسمعش غير لقلبك وسلم قلبك للّي خلقه وتوكل على الله".

 

 

 

 

View this post on Instagram

 

 

 

 

 

 

 

 

 

 

 

A post shared by Tamer Hosny (@tamerhosny)