قالت عبير أحمد، مؤسس إتحاد أمهات مصر للنهوض بالتعليم، وائتلاف أولياء الأمور، إنه مع اقتراب امتحانات الفصل الدراسي الأول 2023 عادة ما تكثر عصبية الأمهات مع الأبناء عند المذاكرة؛ مما يسبب توتر وضغط للطلاب بحجة الحصول على أعلى الدرجات و«يشربوهم المنهج».

ونشرت عبير عبر صفحة الاتحاد بموقع التواصل الاجتماعي الفيسبوك: «رأيكم إيه؟ هل بتسيبوا ولادكم يعتمدوا على نفسهم وبتساعدوهم لما يحتاجوكم ولا بتتعاملوا إزاي؟.. خلونا نفيد بعض»، وذلك في محاولة لمعالجة تلك القضية وعدم الضغط على الأبناء عصبيا ونفسيا من أجل الحصول على أعلى الدرجات.

وتفاعلت عشرات الأمهات على المنشور، حيث قالت ولي أمر: «لا طبعا، بتابع أول بأول ومع المدرسين وفي البيت لأن مينفعش ترك الأولاد مع نفسهم حتي وإن كبروا بتزيد المسئولية علشان يستوعبوا، هم في ايه ولازم يكونوا ايه وإزاي، والله المستعان وربنا معانا جميعا يارب».

وأضافت ولي أمر أخري: «لازم للأسف، أتابع وأذاكر معاهم ومش بسبهم وخصوصا أيام الامتحان بكون متوترة أكتر منهم لدرجة بنام أحلم بيها، كل تفكيري في الامتحان والدراجات».

وذكرت ولي أمر: «حقيقة الموضوع بيختلف من طفل لآخر، في طفل لازم تقعدي معاه لأنك لو مقعدتيش معاه مش هيعمل حتي الواجب مش يذاكر وده للأسف بيكون اعتماده الكلي والجزئي على الأم، وفي طفل آخر مبيحتجش إننا نكون معاه بصفه دائمة ومجرد إعطاءه نقاط يشتغل عليها بيقوم بواجبه على أكمل وجه ودول طبعا قله قليلة، وصراحة مع المناهج الجديدة صعب جدا ترك الطفل لوحده يذاكر، فبالتالي لازم نكون قاعدين معاه طول الوقت علشان يقدر يلم المنهج الطويل ويحصل كويس فيه».

وتابعت: «على الرغم من اعتراضي الشديد على أننا بنقعد معاهم طول الوقت إلا أن بعض الأمهات بيكونوا مجبرين على كده للأسف، وده بيحط الأم تحت ضغط نفسي وعصبي وخاصة لو في أكتر من طفل وفي مراحل تعليم مختلفه فبتكون مشتتة حقيقة بين أكثر من منهج وأكتر من واجب، مما يخلق مزيد من العصبية والصوت العالي وساعات ممكن توصل لأكتر من كده بكتير، بس حقيقة كان الله في عون جميع الأمهات».

ومن جانبها، شددت مؤسس إتحاد أمهات مصر وائتلاف أولياء الأمور، على ضرورة البعد وتجنب أي عصبية وتوتر وضرورة اتساع صدر الأمهات مع أبنائهم خلال المذاكرة حتى لا ينقلب الأمر للعكس، ويؤثر على الطالب تأثير سلبي.